Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe here Jan van Arkel lossede dat lant van Overijsel, ende hoe hy cofte dye heerlickheyt van Laghe; ende van der ommuringhe van Renen.
Dat IIII capittel.

Here Jan van Arkel, biscop van Uutrecht, heeft doen versoeken an sine steden ende ondersaten om hulp ende bystant te mogen lossen dat lant van Overysel, dat welcke sijn voersaet heer Jan van Diest, biscop van Uutrecht verset hadde an den hertoghe van Gelre; dat welke een igelic gaerne ende willichlic dede ende volbrochte, want de biscop vercreech dat lant van Overysel weder an hem om die zomme van LX dusent gouden Gelresse riders. Ende dese penningen ontfingen hertoech Reinout van Gelre ende Eduwaert sijn broeder. Ende want die biscop dese voerseyde zomme niet al tot enen mael een mochte vervallen ende betalen, so sette hi den hertoech van Gelre weder in die hant tot een onderpant dat slot Ter Horst ende Stoutenburch, ter tijt toe dat hi geheel ende al ware betaelt. In datselve jaer van XLVII cofte biscop Jan van Arkel die heerlicheit mitten slote te Lage van heere Aelbert, ridder, ende sine wive, ende mit alle sijn toebehoren voer V C ponden. Ende want die biscop tot sekere dagen ende terminen nyet en betaelde, sijn daerof gecomen vele costen ende scaden. Item. In datselve jaer began biscop Jan van Arkel te bemuren die stede van Renen, ende volbrocht dat eerlicken in lancheit van tijden, als men hudens daechs noch sien mach.⁴¹²

Item.⁴¹³

412 aangevuld naar C, p. 124; ontbr. AB.

413 ontbr. AB.

[p. 211r]

Op sinte Cecilien avont heeft die biscop van Uutrecht doer hulp van sinen broeder here Robbrecht van Arkel, here Hubrecht van Culenburch, here Jacob van Nievelt binnen die stat van Uutrecht verwonnen, al vechtende die Gunterlinghen, ende verdreef se ende verbande se uut sine stat van Uutrecht omtrent III C personen.