Van den rekeninge ende der groter sculden des biscops van Uutrecht.
Dat XI capitel.
Als nu dat bestant tusschen dye van Uutrecht ende den Hollanders geordineert ende gemaect was, heer Sweer Uuterloe, vicarius des biscops, heer Jan van Culenburch, heer Henric van Vianen, heer Jan van Woudenburch, heere Gijsbrecht van Sterkenburch ende heer Jacob van Lichtenburch, ridderen, als voechden ende bewaerders des bisdoms, sijn gecomen tot here Jan van Arkel, biscop van Uutrecht, seggende: 'Genadige here, wi en konnen noch en mogen niet langer dragen uwe sculden ende daervoer staen; ende daerom, soe verkyest een van tween: gheeft ons weder onse uutgeleide penningen, oft set ende geft ons in handen te pande dat gehele lant ende heerlicheit an dese sijde der IJselen.' Die biscop seer beladen wesende mitter saken, en wist niet wat te antwoerden; ende hi en besat int hele bisdom nyet dat in sijnre macht was, dan alleen dat slot tot Vollenhoe mit sinen toebehoren, want here Vrederic van der Eze hadde tot enen onderpande doer sine onredelicke rekeninge dat gehele lant van Overijsel. Doen seiden noch dese VI voechden voergenoemt: 'Belieft het mijn here ons te geven tot enen onderpant dat lant an deser side der IJselen myttet casteel van Vollenhoe mit sinen toebehoeren, ende noch XXX jaer lang u segel of der kercken van Uutrecht zegel, wij sullen daermede te vreden wesen, ende wi sullen mijn here geven jaerlixs die zomme van twedusent ponden.' Dit soude die biscop alle wel hebben ghedaen, en hadden si dat slot van Vollenhoe niet begeert. Daerenboven so woude dat meere deel des capittels dese begeerten ende saken nyet admitteren ende toelaten. Die biscop merckende ende overleggende dat hi tot genen einde van sine sculden comen en mochte, ende dat hem niement niet meer lenen noch borgen en woude, ende dat dese VI, daer hi wilen eer sijn betrouwen op hadde geset, heren meenden te worden van sijn bisdom, heeft hi se absolveert ende verlaten van haer officie der voechdien also veel als in hem was. Ende heeft zijn zegel bevolen here Gerrit van Veen, canonic in den Dom, ende maecte hem sine vicarius. Ende die biscop van groter scaemten, is hi opghestaen alleen mit VI paerden, ende is gereden te Rome, latende dat bisdom dat geval der avonturen.
Auteursrechtelijk beschermd