Van den hijlicke hertoge Phillips van Bourgongen Lehardi.
Dat XVIII capitel.
Int jaer Ons Heren M CCC ende LXIX starf, sonder blikende geboerte after te laten, Odo, hertoge van Bourgongen, die te wive getrout hadde Margriet, grave Lodewijcs enige dochter van Vlaenderen. Ende also hi sonder kinder gestorven was, so devolveerde ende quam dat hertoechdom van Bourgongen an die crone van Vrancrijc. Ende die coninc Kaerle van Vrancrijc, geheten die Wise, dede terstont dese vrouwe Margriete, hertoechinne van Bourgongen, trouwen sinen joncsten broeder, Phillips Lehardy, ende gaf hem daermede te hijlic dat hertoechdom van Bourgongen. Ende aldus hadde dese vrouwe Margriet II hertogen van Bourgongen te manne. Dese hertoghe Phillips Lehardy wan bi sinen wive III sonen ende III dochteren. Die eerste soen was geheten Jan, ende worde gheboren int jaer van M CCC ende LXX in die stede van Dygon in Bourgongen; aldus hiete hi Jan van Dygon, ende hadde te wive hertoge Aelbrechts dochter van Beyeren, grave van Henegouwen, van Hollant, Zeelant ende Vrieslant. Die ander soen hiete Anthonis, ende worde na vrouwe Johanne doot, hertoechinne van Brabant, sijnre moeders moye, hertoge van Brabant, van Lottringhen ende Limburch, ende hadde te wive grave Walravens dochter van Simpol. Die derde soen, gheheten Phillips, was grave van Nyevers, ende hadde te wive Glande, des graven dochter van Deu. Die eerste dochter hadde te man hertoech Lupolt van Oestenrijc. Dye II hadde te man hertoghe Willem van Beyeren, grave van Henegouwen, van Hollant, Zeelant ende Vrieslant. Die III dochter hadde te man Amedens, grave van Savoyen, ende worde na gemaect hertoech van Savoyen. Dese begaf de werlt, ende leide een eenvoudich leven in abstinencie, ende worde namaels int consili van Basel gecoren tot enen paeus van Romen, ende was geheten Felix die V, dwelc hi na resigneerde, ende bleef cardinael ende legaet.
Auteursrechtelijk beschermd