Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe hertoge Aelbrecht creech thuys te Vredelant.
Dat XIX capitel.

Int jaer Ons Heren M CCC ende LXX, so vant hertoge Aelbrecht onder sine andere registeren die oude ende princepale brieven, mits diewelke die goede graef Willem van Henegouwen ende Hollant sijn oude vader dat casteel van Vredelant mit sinen toebehoren beleent ende in onderpant hadde, voer die somme van III M ende CC ponden, die here Jan van Diest, biscop van Uutrecht, daerop ontfangen hadde. Waerom dat hertoghe Aelbrecht begeerde te hebben die heerlicheyt ende tslot te Vredelant of sine somme van penninghen. Op diewelcks eyssche die raet des

[p. 226r]

Stichts van Uutrecht antwoerden ende seyden, als dat here Jan van Arkel, biscop tUytrecht dat slot te Vredelant mit sinen toebehoren ghelost ende ghevrijt hadde, ende hadde daervoer betaelt vrouwe Margriete, keyserinne van Romen, des goeden grave Willems dochter, sijnre moeder, die somme van VII M ponden, als men hiervoer bescreven vint, int jaer M CCC ende LIIII. Mer hertoge Aelbrecht allegeerde contrarie, seggende dat die princepale brieven van der beleninge onder hem lagen; aldus woude hi dat huys hebben, oft die somme van penningen; van welcker twist hierna grote rumoer ende tweedracht opgeresen is tusschen dat Sticht ende Hollant. Mer hertoge Eduwaert van Gelre, die hertoghe Aelbrechts dochter was versekert ende trouwen soude, die nam dese sake op, ende dede daerof een uutspraec, als dat die biscop van Uutrecht oft die III staten van den lande gheven ende betalen souden hertoge Aelbrecht tot sekere daghen⁴⁴⁸ ende terminen die voerseide somme van penningen, oft dat slot van Vredelant mit sinen toebehoren soude bliven ende comen tot ewigen dagen an die graeflicheit van Hollant.

448 daghev AB.