Hoe heer Ot van Arkel oflivich worde ende van Jan sijn zoen.
Dat XLVII capitel.
In ditselve jaer starf heer Otte van Arkel, heer van Pijerlepont ende der landen van Mechelen. Ende worde mit groter eren begraven in die stede van Gorichom in sijn ouders graf. Ende hem volchde in sine heerlicheden sijn enighe zoen gheheten joncheer Jan, dye te wyve hadde des eersten hertoghe Willems dochter van Gulijck. Wiens broeders waren: hertoghe Willem ende hertoghe Reynout van GulijckGa naar voetnoot472 ende van Ghelre, daer hy niet dan een enighe soen an wan, gheheten Joncheer Willem, die in Gorichom gheslaghen worde int jaer dusent IIII C ende XVII, ende starf sonder kinder, als voer gheseyt is. Dese jonckheer Jan van Arkel was een opgheblasen, hovaerdich ende ongenadich mensche, nyet hebbende van sine vaderlijcke doechden; want hi sijn eygen moeder, des graven dochter van Baer, dede ofsluten van den huyse van Arkel, ende uut alle sine heerlijckhedenGa naar voetnoot473 verdriven. Ende als si vele molestacien ende vervolginghe van haren soen hadde gheleden, most si van noots weghen trecken in haren eyghen vaders lant. Ende als si in dat casteel van Pyerlepont nyet comen en mochte, was sy des qualijcken te vreden, ende verclede haer gelijck een malaetsche vrouwe ende dede laghen legghen omtrent dat casteel; ende quam also ombekent op dat slot. Ende op dye brugghe wesende, dede si een teyken, ende begreep manlijcken dat slot van Pierlepont, ende behilt dat mit alle sine heerlicheden, daer si ten lesten oflivich worde.
Auteursrechtelijk beschermd