Van vrouwe Jacoba, die XXV graefinne van Henegouwen, Hollandt, Zeelandt ende Vrieslant.
Dat II capitel.
Jacoba, hertoge Willems enige erfdochter, als haer vader oflivich ende begraven was, was si bi haer moeder, vrouwe Margriet, hertoge Jans dochter van Bourgongen, ende waren met allen sere bedroeft van den doot haers liefs heren man ende vader. Ende als die uutvaert mit grooter droefheit was ghedaen, worde si mit grooter staet ende feeste gehult in den lande van Henegouwen, in allen steden ende plaetsen. Si en was mer XVI jaer out, als si haer heerlicheden ende vaderlijcke erve annam; God betert, si en mochte se mit rust ende vrede niet gebruyken, want dye II parthyen bestonden weder in Hollandt op te staen: die van der Hoecxs partye waren hildent mit vrouwe Jacob, haren rechten lantsvrouwe; ende die Cabbeljaus partye waren haer altijt contrarie. Waeromme dat si alle die dagen haers levens in grooter tribulacien ende verdriet overbrochte ende regneerde, als ghi na horen sult.