Skiplinks

  • Tekst
  • Verantwoording en downloads
  • Doorverwijzing en noten
DBNL Logo
DBNL Logo

Hoofdmenu

  • Literatuur & Taal
    • Auteurs
    • Beschikbare titels
    • Literatuur
    • Taal
    • Limburgse literatuur
    • Friese literatuur
    • Surinaamse literatuur
    • Zuid-Afrikaanse literatuur
  • Selecties
    • Onze kinderboeken
    • Basisbibliotheek
    • Tijdschriften/jaarboeken
    • Naslagwerken
    • E-books
    • Publiek Domein
    • Calendarium
    • Atlas
  • Gebruiksvoorwaarden
    • Hergebruik
    • Disclaimer
    • Informatie voor rechthebbenden
  • Over DBNL
    • Over DBNL
    • Contact
    • Veelgestelde vragen
    • Privacy
    • Toegankelijkheid
  • Verantwoording
  • Inhoudsopgave

Downloads

PDF van tekst (7,69 MB)






Editeur
Aarnoud de Hamer



Genre
non-fictie

Subgenre
kroniek
non-fictie/geschiedenis-archeologie


© zie Auteursrecht en gebruiksvoorwaarden.

 

Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

(2011)–Cornelius Aurelius

Vorige Volgende

Van hertoge Aernt van Gelre, heer Jans zoen van Egmont.
Dat XXI capitel.

Des sjaers daeran, als men screef XXIII, so bleef scieliken doot in der Velue hertoghe Reynout van Gulic ende van Gelre, grave van Zutphen, sonder enige kinder after te laten, ende worde begraven tot Monichusen van der Carthuser oerden bi Aernem. Ende na sinen doot quamen die heerlicheden ende landen an die kinder van vrouwe Marie van Arkel, heer Jans wijf van Egmont, want si was hertoge Reynouts suster voerseyt. Dese Reynout van Gelre had te wive des graven dochter van Artoys; mer si en hadden gheen kinder tesamen. Ende hy had hair gemaect tot hair duwarie ende lijftochte dat hertoechdom van Gulic, hair leven lang gedurende. Ende dese vrouwe Marie nam dairna te man Odolf, hertoge Willems soen van den Berghe, ende si starf daerna int jaer van XXVI. Daernae, als op die octave van Sinte Peter ende Pouwels Apostelen, worde Aernt, heer Jans outste soen van Egmont, ende vrouwe Marie, heer Jans dochter van Arkel, die noch in der vangenissen sat, als een waerachtich erf-

[p. 266v]

genaem hertoghe Reinouts van Gelre, van allen steden ende van allen baroenen, heren ende ridderen ontfangen ende gehult als een hertoge van Gelre ende grave van Zutphen, hem doende haren eet als dat gewoenlic is. Dairna, op Sinte Marien Magdalenen dach, worde hem te wive gegeven ende ondertrout Katherine, des eersten hertoge Adolfs dochter van Cleve, out wesende VII jaer. Ende alsoe dese hertoge Aernt niet meer dan XIIII jaer out en was, als hi hertoge worde, so onderwan ende regeerde heer Jan van Egmont sijn vader dat lant van Gelre ende Sutphen als ruwaert ende voecht van sinen sone; ende doe si tot haren jaren gecomen waren, trouden ende besliepen sij malkander ende creghen veel kinder, als Adolf, die na hem hertoge worde, Willem, die jong starf; Maria, coninginne van Scotlant; Margriete, hertoechinne van Beyeren, ende joffrouwe Katrine, die ongehuwelict bleef.


Vorige Volgende