Van den554 doot heer Vredericxs van Blanckenhem, biscop van Uutrecht.
Dat XXII capitel.
Op Sinte Dionijs dach, int selve jaer als heer Vrederic van Blanckenhem, biscop van Uutrecht, een man van vele jaren, dat bisdom glorioselic in groter rusten ende vreden XXX jaren ende een halve hadde berecht, op sijn slot tot Vollenhoef oflivich geworden, die dat Sticht ende kercke van Uutrecht tot sijnre ewiger memorien vele goets hadde gedaen. Ende als hi gestorven was, worde hy van sine edelen ende familie mit groter triumphen ende feeste op enen wagen gevoert tot voer de poerten van der stat, daer hi van al den geestelicken staet ende waerliken heren ende burgeren, mit crucen ende vanen, mit love ende sange, gebrocht wort in die Domkerke, ende worde aldaer begraven an de zuytside van dat choer, onder enen costelicken ende preciosen tombe, mit sine wapenen van sijnre ofcoemste heerlic gechiert.