Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den eersten strijt dye int dorp van Alphen geviel, ende hoe heer Jan van Arkel uuter vangenissen gelost worde.
Dat XXXI capitel.

Die steden van Hollant mit haren adherenten seer ovel nemende dat vrouwe Jacobe aldus in den lande van Hollant was verheven, ende dat die avontuer haer dus mede ghing, hebben van stonden an haer ontseit, mit die stede van der Goude, ende alle diegene die hair helpen mochten. Ende hebben uut haren steden ende dorpen vergadert alle haer macht, ende gingen gelijc na der Goude om te bescutten dat si niet veerder in Hollant quamen. Ende wenich tijts daer te voren was hertoghe Phillips van Bourgongen als voecht ende momber gehult in Hollant, Zeelant ende Vrieslant, geliken hertoghe Jan van Brabant als voecht ontfangen was in Henegouwen, daer nochtans haer rechte geboren lantsvrouwe in den lande was ende gesworen hadde, ende dat besegelt, anders genen here noch vrouwe te kennen noch te nemen na hertoech Willems doot, dan sijn enighe erfdochter, etcetera. Ende als die steden voerseyt mit hoer volc van wapenen hair bannieren hadden ontwonden ende gecomen waren in den dorpe van Alphen, soe quamen hem dair te moet de van der Goude, mit groter macht van volc; ende tquam tot enen groten stride. Dat geroep was groot, ende elck was vroem om die overhant te houden. Mer ten lesten keerden die steden den rugge, ende liepen na Leyden toe. Die van der Goude cregen die victorie ende namen vele gevangen. Ende si cregen oec mede die banniren van Leyden, Haerlem ende Aemstelredam, ende quamen mit groter zeghe ende eren weder binnen der Goude. Dese strijt gesciede des dages na der Elfdusent Maechdendach, int jaer van XXV.

In ditselve jaer, soe worde heer Jan van Arkel⁵⁷² gelost ende gecoft⁵⁷³ uuter vangenissen, dair hi X jaer in geweest hadde bi toedoen des joncheren van Wesenmael ende Willem van Ghent. Hi was oudevader van hertoge Aernt van Gelre van sine moederwegen. Ende als hi verlost was, worde hi ontfangen in sine vaderlicke erven ende landen als een recht eerfgenaem in die stede van Lederdam ende opt slot aldaer, ende in dye heerlicheit van Scoenrevoert, ende in allen horen toebehoren; mer in de stede van Gorichom noch int lant van Arkel en quam hi niet. Ende III jaer dairna starf dese heer Jan van Arkel, ende wort begraven in de stede van Lederdam. Ende hertoge Aernt van Gelre worde in dyeselve stede ende in allen anderen landen gehult ende ontfanghen als een recht erfghenaem. Ende corts daerna so gaf dese hertoge Aernt doer begeerten heer Jans van Egmont, sijns vaders, die heerlicheden voerseyt Willem van Egmont, sinen jongsten broeder; ende die wort overal ghehult ende ontfangen.

572 Alkel AB.

573 gecost AB; gekocht C.