Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den stride die te Brouwershaven ghevyel teghen den Enghelschen.
Dat XXXII capitel.

In den jaer Ons⁵⁷⁴ Heren M IIII C XXVI, als die hertoge van Cloucester vernomen hadde dat vrouwe Jacobe in Hollant was gecomen, ende dat si sommige steden in hadde, sende hi den heer van Filwater mit vele Enghelschen by vrouwe Jacobe te trecken in Hollant, ende is gecomen te scepe in Zeelant tot Brouwershaven. Dwelke hertoge Phillips van Bourgongen vernemende, heeft terstont als ruwaert der landen geboden allen ridderen, heren, vasallen ende andere gemene luden, dat men hem volgen souden om die Engelschen te wederstaen. So is hi mit groten volcke, so sijns selfs, so Hollanders, den Engelschen te moete ghetogen. Doe sandt die heer van Filwater een heraut geheten Cloucester, vragende den hertoge van Bourgongen oft hem beliefde mit hem dair te striden; hi woude hem dairtoe verlenen plaetse ende velt. Dairop hertoge Phillis antwoerde sandt mit sinen heraut geheten Bourgongen, dat hem nyet en betaemde te offereren plaets ende velt om te striden, mer dat hy selver wel machtich wair om plaetse te setten te striden alst hem beliefde. Op dese tijt quamen oec tesamen dye heer van Haemstede, Jan van⁵⁷⁵ Renes; Jan van Hodenpijl ende Andries van Walmis, ridderen, ende vergaderden enen groten⁵⁷⁶

574 on AB.

575 vas AB.

576 gorten AB.

[p. 271r]

menichte van volc van wapenen, ende quamen den Engelschen te hulpe. Ende als dye Engelschen ende dese heren⁵⁷⁷ byeen waren gecomen, sprac die here van Filwater totten heere van Haemstede: 'In desen anstaenden stride en mach ic in minen eygen persone nyet wezen om te striden teghen den hertoghe van Bourgongen, ons wederpartye, want ick hem beloeft ende gesworen hebbe tot anderen tiden dat ic tot genen tiden meer tegen hem striden of vechten soude; aldus en sout mij niet betamen tegen hem te striden, opdat ic niet meinedich en worde bevonden.' Als die here van Haemstede dat hoerde, seyde hy: 'Ist also, ghy segt soe: hout uwen eet; mer doet ons u heer van volc, dat mit u hier gecomen is, ende wi sullen u gheleyden tot in u scip om wederom in Engelant te trecken. Ende wy sullen u volc brenghen tot vrou Jacobe ter Goude.' Dwelc hem alsoe goet docht, ende hi dede alsoe. Doen stelden hem dese heren mitten Engelscen in goeder ordinantie, ende gingen den hertoge van Bourgongen te gemoete. Die voerhoede van den hertoge dat siende, sprongen uut haer scepen opt lant, ende mit ontwonden bannieren gingen si den Engelschen tegen, ende begonnen in den eersten mit ghescutte an te gaen, daer dat gescut also dicht in der lucht vloech, oft hagel hadde geweest. Die heere van Haemstede worde myt een strale in zijn been gescoten, ende dier geliken heer Vranc van Borsselen, ridder, mer Jacob van Borsselen bleef dair doet. Als nu die Engelschen mitten Zeelanders hem dus vromeliken hadden ende de ander volna verwonnen hadden, doen trat hertoge Philips mit die van Dordrecht ende van Delft ende mit die afterhoede sijns heers uuten scepen opt lant, ende quam sine vrienden te hulp. Ende hy sloech daer enige nijewe ridderen, ende quam doe haestelike mede in den stride, ende sloech vervaerliken op dat vermoeyde heer. Ende die hertoge, als een vroem man, worde seer verlast in den strijt, ende dede wonder van wapenen, doerslaende haer battaelgen, hemselven avonturende. Mer heer Jan van Villain, een vroem ridder, quam hen te ontset, ende maecte plaetse; ende daer en bleef niemant doot van sinen edelen, dan heer Andries van Belly, een vroem ridder. Ten lesten die Engelschen vermoeyt wesende van den stride verloren den moet, ende hertoge Philips wan den strijt. Ende daer bleven doot uut Zeelant heer Jan van Renes; heer Jan van Hodenpijl; heer Costijn van Haemstede; here Raes van Haemstede; ende heer Andries van Walmis, ridderen. Ende die heer van Haemstede worde daer gevangen mit II C Enghelschen. Ende dair bleven wel III M Engelschen verslagen, diewelken na tugenisse der Engelscher herauten uutgesocht waren voir de bloeme van den volke van wapenen ende archiers die in Engelant waren. Dese stryt ghesciede bi die stede van Brouwershaven op Sinte Ponciaens dach.

577 heeen AB.