Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek) (2011)

Informatie terzijde

  • Verantwoording
  • Inhoudsopgave

Downloads

PDF van tekst (7.77 MB)

XML (3.56 MB)

tekstbestand






Editeur

Aarnoud de Hamer



Genre

non-fictie

Subgenre

kroniek
non-fictie/geschiedenis-archeologie


© zie Auteursrecht en gebruiksvoorwaarden.

Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

(2011)–Cornelius Aurelius–rechtenstatus Auteursrechtelijk beschermd

Vorige Volgende

Hoe dat die hertoge mit sinen sone verenicht worde.
Dat XLI capitel.

Als nu dese twist tusscen die vader ende dat kint omtrent II jaer gestaen hadde, ende nyemant, hoe groot hij ware, die zoene maken en mochte; waeromme die edelen van den landen ende alle die steden gemeenlic arbeiden uutermaten sere om enen pays te maken, anmerckende die groote ende onverwinlike scaden die hem daerof opcomen ende anstaen mochte. Waerom die hertoge in hemselven overdenckende die genegentheden sijnre landen tot sinen sone, ende overleggende die periculen die den landen daerof gebueren mochten, liet de sake wat wesen ende began wat sachtliker daermede voert te gaen. Ende binnen desen tiden was die bastert here Anthonis ten hove gecomen, ende merckende dien staet des hofs sijns vaders, arbeide sere naerstich bi sinen vader, also dat hi vercreech dat sinen broeder, den grave van Charloys, weder restitueert ende gegeven worden alle sine heerlike eygeliken goeden ende domeinen; mer die hertoge en wilde hem noch niet sien voer ogen. Nochtans, bi raet sijnre heren ende raden ende der regenten van Ghent ende Brugge quam hi stouteliken binnen Brusel met VII C archiers van Ghent ende CC van Brugge, uutgenomen andere heimelike vrienden die hem hulp ende bystant deden ende dach ende nacht bewaerden; ende ghinc dagelicx over die straten als een enige soen ende toecomende erfgenaem des hertoechs sijns vaders, in versmadenis ende tot spijt alle dergeenre die dus hem lange tegen sinen vader vermaect ende te viant gehouden hadden. Ende als hi binnen Brusel gecomen was, sant hi terstont sekere notabele ende eerbare personen begerende oetmoedelic dat hi gewaerdigen wilde te horen sinen enigen soen, die bereit was hem mit reden te excuseren van al dat men hem opseggen soude mogen, want hi hem nye vertoernen en wilde; ende oft hij hem vertoernt mochte hebben, die sake waerin begeerde hi herteliken te weten; ende waert dat hi sculdich gevonden worde, hi woude hem oetmodeliken setten tot correctien sijns heren ende vader, ende genade dairvan begeren. Die hertoge en woude geensins dese notabele mannen horen, mer geboet terstont dat sine soen uut Brusel trecken soude, oft hi wilde hem mit crachte daeruut verdriven. Die goede grave van Charloys dit horende was droevich, ende soude terstont uut Brusel gereyst hebben, willende sinen vader onderdanich wesen als een goet kint sculdich is van doen, mer dye raet van Ghent ende van Brussel hilden hem mit machte. Ende bleef aldus binnen Brusel ombeset ende bewaert mit vele archyers ende dyenres, ende niemant van sine adversanten en dorsten uuten hove comen, beducht wesende geslagen te worden. Nochtans brochten si den prince dairtoe, dat hi mit grote macht van volc uut sinen palays ghinc om sinen soen te slaen, te vangen oft te verdriven uuter stede. Mer doer grote instancie bidden ende begeren van sommige eerbare ende edele vrouwen ende joncfrouwen, keerde hi weder tot sinen palayse. Binnen desen tiden is here Anthonis die bastert secretelic gecomen bi sinen broeder, die grave van Charlois, ende begeerde naerstelic te weten die cause des twists tusschen sinen vader ende hem, ende narreerde sinen broeder alle die verraderien des conincs van Vrancrijc ende sijns vaders raden, die hem wedervaren waren ende geleden hadde; want en hadde God hem niet bewaert, hi soude sonder twifel onderwegen doot gebleven hebben. Ende mit desen worden si beide bedenckende, ende vernamen dat grote bedroch ende verraderie des conincs ende haers vaders raden ende die thof regeerden. So geboerdet op een tijt dat die bastert, here Anthonis, al heymelic bi sinen vader quam, ende sprac aldus: 'Ic bidde u mijn here mijn vader, dat ic een woert tegen u spreken mach.' Ende seide aldus: 'Waerom, mijn lieve vader, geloefdi dus sere der vermaledider pluymstrikers ende oerstekers woerden, seggende: "Kaerle u soen begeert u doot"? Voerwaer, mijn here vader, ten is also niet, want ic hem anders bevonden heb'; ende onder andere woorden de si te samen hadden, so arbeide die bastert so naerstelicken, dat die prince admitteerde ende was te vreden dat sijn soen bi hem quame, ende gave reden van dat hi op hem te seggen hadde. Doen sprac die hertoge, ende seide: 'Laet mijn soen comen.' Ende die

[pagina 305v]
[p. 305v]

bastert viel plat opter aerden, ende dancte sinen here vader, dat hi audiencie bi hem gevonden hadde, stont hi op ende ghinc haestelic om sinen broeder, den grave van Charloys. Die grave comende bi sinen vader, viel plat opter aerden, ende groetede sinen vader. Die prince nam hem op ende custen; ende van dien tijt voert quamen tevoerscijn alle die secrete verraderyen ende anslagen des conincs van Vrancrijc ende sommige der raden des hertogen. Die prince dit horende, verwonderde seer ende was mit allen gram opten genen dye dese anslagen gemaect hadden. Dese pays ende vereninge tusschen den vader ende dat kint was gemaect int jaer M CCCC LXV, opten Goeden Vrydach. Opten heiligen Paeschdach wert si ghecondicht der edelder vrouwen, dye graefinne van Charloys tot Gorichom, in den choer, onder hoechmisse, waervan dat si uutermaten sere verblijt was. Desen pays gemaect wesende vluchten vanselves uut des princen hove alle die doorsaken ende doccasien van desen twiste geweest hadden, ende vloden alle in Vrancrijc bi den coninc. Dwelc den prince meerder suspicie ende quader vermoeden maecte.


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken