Hoe dat sommige heren uut des princen hove vluchten, ende hoe hi enen anderen stedehouder van Hollant ende Zeelant maecte.
Dat XLII capitel.
Die grave Jan van Stampus ende here Jan van Croy, des hertogen overste raden, siende dat grave Kaerle van Charloys verenicht was mit sinen vader, die si dus lange twistende gehouden hadden, ruymden al heimelic mit allen horen adherenten ende fautoren uut des princen hof, ende togen in Vrancrijc bi den coninc Lodewijc, die se vrientliken ontfing. Ende als die prince dit verhoerde, gheloofde hi te bet die woerden sijnre sonen. Een tijt hierna geboerdet dat die grave van Charloys doer tlant van Vlaenderen reysde, ende dede justicie doen in sommige steden over enige van den oversten ende regenten van der stede om hore misbrukingen ende quade feiten die si misdaen hadden. Na desen quam hi in Hollant, ende reisende van Haerlem tot Leiden om in Den Hage te trecken; terstont ruymde here Jan van Lanoy, die stedehouder, dat lant, ende en dorste den grave nyet verwachten, ende vloet mede in Vrancrijc, want hi hemselven sculdich kende. Ende die coninc ontfinc hem mede, gheliken den anderen. In sijn stede wert stathouder van Hollant, Zelant ende Vrieslant gemaect Lodewijc van Gruythusen uut Vlaenderen. Na desen bestont die coninc Lodewijc van Vrancrijc enen evelen moet te nemen doer quade informacie op sinen broeder Kaerle, hertoge van Berri, hertoge Phillips van Bourgondien ende tegen meer ander van den edelsten ende besten van der cronen. Ende hertoge Philips dede bannen alle die voorscrevenGa naar voetnoot81 voirvluchtige heren uut alle sine landen, ende ordineerde sinen soen, den grave Kaerle van Charloys, een prins ende overste van den oerloge. Ende desen macht vercregen hebbende ende gebrukende, had hem als een lewe stout ende vroem, ende in allen striden dye eersten; ende keerde die vianden uut sijns vaders landen, ende trac oec in sijnre vianden landen, doende vele scaden van roven ende branden, als men hierna noch horen sal.
Auteursrechtelijk beschermd