Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat de stede van Wageninge gewonnen wert.
Dat XXVI capitel.

In ditselve jaer van LXXX, als de prince Maximiliaen lange tijt in Den Hage siec gelegen had ende een luttel convaleceert ende gebetert was geweest, so heeft hy bi rade zijnre heren een deel gewapents volc gezonnen voir de stede van Wageninge in Gelrelant, want de Gelresse overmits desen den Rijn gesloten hilden, datter in desen landen niet nedercomen mocht. So zijn dan die capeteinen als Jan, hertoge Jans zoen van Cleve, ende heer Jan van Egmondt, mit allen desen groten hoop volcs over den Rijn ende belaghen een starcke fortresse ende slootken gheleghen tot Raweswaij, neffens die stede van Wijc te Duersteden over geleghen, dat si in corten uren wonnen, ende stakent alle dye keel af dye daerop waren. Ende toghen voert doer vele dorpen, dye zij alle aen brande staken tot voer Wagheninghen; dewelcke sij alle omme beleyden ende deden menych swaer assault ende storminghe an de stede mit grote bussen ende andere intrumenten. Die van binnen setten hem vromelic ter weer, betrou-

[p. 379v]

wende op die starckheit van hoerre stede, ende hoopten seer dat de biscop van Munster, voecht van Ghelre, soude se comen ontsetten. Ten lesten hadden si gebrec vitaelghe, ende die biscop en quam nyet, want hy weder in sijn Sticht ghereyst was. Aldus so gaven si hem op in des princen handen, behouden hoir lijf ende goet. Ende si quamen dairin, ende alsdoen wert die stroem weder gheopent. Dairna niet lange begrepen enige Gelressen knechten die stede van Venloe, ende deden die steden van Wageningen, Nyemegen, Zutphen ende andere tegen den prince weder rebelleren.