Sjweitberg (onder ps. G. Rapaille)

[p. 6]

De serieus dinger van de luj van Sjweitberg waere 't meis durg de vrouwluj geveuld, belaefd en oetgedrage. Dat is kaolik get nuujts te neume. Volges Feel is dat ein volkscultureel versjeinsel, zoë oud wie de welt. Wie dan auch, ester 'n traon weggepinkt mot waere gaeve de maedjes zich ongerei de papiere zakdeuksjkes durg, trueste hun blaage, es de mansluj get gesjeneerd sjtont te sjnoëtere of d'r kalk van d'r plefond kieke. 'n Sjweitbergeres hat sjwiege geliërd, omdat sjwiege goud is en klatsjbazele zink. En wiél d'r Sjweitbergse man neet zal wille weite wie nuedig 'm de vrouwluj zint. Enthans, volges Feel, dat waal.

Feel, vrund van alle vrouwluj die dat neet sjnappe.

[p. 7]

Baer

- 't Is sjtil in de dil. 't Liekt esof eederein de tong verlaore hat. Zoë sjtil.

Eigelik wil ich 't neet druever höbbe... Mè, iërlik is iërlik, de waorheid mot gezag waere. Este zelf verdretig bis. Neet wets wat aan dich is. Es traone zich hawwe mit kaodheid om 't wòrom. Worom? Kopwolke make mie zicht mistig. Dus vertel ich 't verhaol van d'r baer, d'r boum en d'r berg. Geweun... om mie sjpaor wir te vinge. 't Verhaol van d'r baer, d'r boum en d'r berg. En d'r pot mit hoënig, neet te vergaete... Good.

Urges in de dil tössje Sjweitberg en Innighaove geuf 't nog baere. Lach neet, geluif mich mer. Dao waor ins eine en dae laefde in enne boum. Ziene boum. De luj lachde nao 'm en reepe: ‘Hoi baer, kom mer nao onger!’ Mè d'r baer bleef zitte.

‘Kom mer nao onger!’ Hae waor toch neet gek.

‘Kom mer nao onger!?’ Dat versjtong hae neet ins. Ziene boum sjting in de dil en 't waor sjtil in de dil. Bie dees dil liekt Sjweitberg. Baoven op d'r berg waor 't ein en al laeve. Baove op d'r berg waor 't gemekkelik roope.

‘Allè baer, kom nao onger! Klum nao baove! Kom!’

D'r baer haw sjwaor puet. Es hae 't soms neet mië oetheel, da kraop hae waal ins oet ziene boum. Sjnachs es 't geine zoog. Sjnachs es hae op zie gemaak kos veule woë d'r grond hèl zat waor. Hèlle grond woë hae teminste van wis dat hae drop kos sjtaon zonger weg te zakke. De luj op d'r berg sjnapde dat neet. Die bleeve roope: ‘Allè baer, kom nao onger! Klum nao baove! Kom!’

Baove op d'r berg, woë 't ein en al laeve is, dao is 't gemekkelik roope. In enne druim haw d'r baer enne groëte pot hoënig geziën en geraoke. Hae raok 'm... Zien naas wou waal waegwiezer ziën. Es hae ziëker wis dat genne kiëk kraop hae oet ziene boum en ging zeuke. Hae zoch en zoch... Uever hèlle grond, van boum tot boum. Berg op en berg aaf. Durg d'r sjloëper van de naate dil. Langs bösj, veld en weije. In klaterbaeksjkes, naeve klaterbaeksjkes. Zeuke. Hae raok d'r honig... Zien naas wees 'm d'r waeg. Hoënigpöt zoë groët wie 'n hoes. Dao! Auw! Hae sjteet ziene poët aan enne fata morgana. Dat is e vraem woërd vuer hoënigpöt, zoë groët wie e hoes. Hae sjteet zelfs zien geveulige naas draan. Zzzzjjjttt! Weg fata morgana! Weg groëte hoënigpot!

[p. 8]

'n Sjtruip verdreet trok durg d'r baer haer. 't Sjweit brook oet, oet ziene kaer. Meug woërt d'r baer. Zoë kort bie d'r hoënig en dan dich toch nog de naas sjtoëte en de puet en neet draan komme! Doëdmeug woërt d'r baer. Doëdmeug waor d'r baer. En 't waor sjtil, benkelik sjtil in de dil.

't Verlange sjloog zich durg d'r baer haer. Hoënig! Hae kratsde zien naas aope van de juek. Hoënig! Vraoge wèjde 'm durg ziene baerebölles. Hoënig! Mit zien sjwaor puet rende hae van Hot (dao waor hae nog noëts gewae) nao Haar (hae wis neet ins woë dat loog). Mit zien klauwe dapde hae in de aerd... nieks. 't Zal baove op d'r berg waal nach gewae ziën. Geine zag of reep get. 't Waor nog ummer ‘gemekkelik roope-waer’ en toch zag geine get.

Onger kiëk d'r baer op de naas. Mit väöl mujte klom hae teruk in ziene boum. Wae d'r oug vuer haw kos 'm sjnachs ziën zitte. Want zien ouge waore naat. Dan zuuste 't reflectere van 't maonesjiensel ins zoë good. Wae d'r oug vuer haw zoog dan ouge die verlangde nao hoënig. Ouge die tegeliek vol waore van dae vraeme baere-angs. Dae angs dat hoënig missjien allein in baere-druime besjteit. En 't woërt guur waer vuer d'r baer. Hae gromde en griëmelde ummer mië. Biej hagel, raege, sjtörm en sjnië. Guur waer vuer d'r baer...

‘Wat zou he nog oet ziene boum kroepe?’ Guur waer vuer d'r baer...

‘Wat zou hae nog d'r berg opsjravele?’ Ziene kop hong sjuin nao onger. Zien ouge... Haw mer eine zien ouge kinne laeze. D'r baer verkleurde... Woërt vaalgries mit wit. Wae 'm zoog zitte kroog 't d'r koud van. Ieskoud. Wae 'm zoog zitte veulde 't sjoevere uever de priej. Zoë koud. En 't woërt benkelik sjtil in de dil.

D'r baer kos neet kalle... Angesj haw hae waal gevraogd woë d'r hoënig te kriege waor. D'r baer kos neet kalle... Angesj haw hae waal kinne vertelle dat hae geine iesbaer waor. Mè de baer kos neet kalle. Nae, d'r baer kos neet kalle. Enne baer kint neet kalle.

Sjtilte deit os sjwiege, e laeve is gedaon.