Sjweitberg (onder ps. G. Rapaille)

[p. 9]

Roza

- In Sjweitberg höbbe de luj wir tied om breeve te sjrieve. Ich kreeg 'n kingerteikening van 'n zieë vol, mit radio's en dao tössjen in flessjepos. En gans klein sjting op 't breefke in die flesj gesjriëve: ‘Aan dich, aafdeiling Kinger’.

Ja, in Sjweitberg woëne auch normaal luj. Zoë wie Roza. Dat is frappant: Roza. Precies derzelfde naam wie e jonk vriendinneke van mich. Roza dus. 't Woënt in de groëte flet en auch nog behuerlik hoëg, wat get te make hat mit 't werk van d'r pap. Ziëvetiën verdeepinge hat die flet en het woënt op de elfde. Roza dus. 't Heisjt precies wie e vriendinneke van mich. Dat is frappant.

Roza geit edere daag mit de lif nao de sjoël. Dat is nog frappanter, want de meiste Sjweitbergse kinger gont mit d'r auto nao de sjoël. Nae, Roza geit mit de lif. Es de sjoël oet is, geit 't natuurlik auch mit de lif nao heim. Logisch idem dito. Dan mak 't hoeswerk en geit get angesj doën. Roza kiek hiël väöl tillevisie. Roza kiek väöl te väöl tillevisie, zaet d'r pap. Roza bedurf zich de ouge, zaet de mam. Roza wet bes dat 't väöl tillevisie kiek. Ze vingt auch dat ze zoë noe en dan te väöl tillevisie kiek, mè: ‘Wat mot e kind wie ich dan soms dèk angesj?’

En dat sjnappe häöre mam en pap dek neet. Die sjnappe dat gaar neet. Die begriepe neet wòrom dat 't väöl tillevisie kiek. In häör dagbook sjrief ze dao waal ins uever. Dan sjrief ze: ‘Jullie vinden wel dat ik veel televisie kijk, maar jullie snappen niet waarom ik veel televisie kijk.’ Es ze zoë aan 't sjrieve is kalt ze väöl in häör eige. Dat sjrief 't natuurlik lang neet allemaol op. Zinne wie: ‘Woë mot e kind wie ich haer, hie op elf hoëg? D'r eine kiër is 't sjlech waer, d'r angere kiër zint gein anger kinger boéte. Dan hat mam 't te drök in de kueke, soms mot ich 'n ganse oer pap helpe mit aafrolle en da is me soms bliej es me zich aeve vuer dat keske zet.’ Dan sjrief ze op: ‘'n Kind als ik heeft soms geen keus. Zouden mensen die honger hebben ook mogen stemmen?’ Dat sjrief 't op en auch nog: ‘Vandaag heb ik al weer een wereld gezien die ik nog niet wist.’

't Is dan zaoterdig iërste 't wets en zaoterdes mot ze papa ziëker helpe mit aafrolle. Pap hat e eige bedrief en dae hat 't dus ummer drök, vueral mit aafrolle, want papa hat e bedrief in sjtrekkende maeters. Daorom woëne ze auch zoë hoëg.

[p. 10]

Este mit sjtrekkende maeters op d'r grond neet oet de veut kins, dan mot 't mer de loch in, hat d'r pap van Roza gezag en saer dae tied zitte ze op de elfde verdeeping. 'n Ganse galerie vuer hun allein. Ein flet om te woëne en de angere vuer allerlei saorte sjtrekkende maeters. Dao is väöl behoefte aan. Eederein hat waal ins enne sjtrekkende maeter van dit of enne sjtrekkende maeter van dat nuedig, neet dan? Sjtrekkende maeter braodwoësj? D'r pap van Roza verkup 't dich van de rol. Enne kilomaeter dropreeme? Idem dito. Macaroni? Van de rol! Watte vuer naasoperaties? Van de rol. Eierwoësj? Van de rol! Sjpagetti, mihoen, bami? Van de rol. Kingerposziëgele? Van de rol. Beer- of knakwuesjkes? Van de rol. Kauwgum, kauwgum en kauwgum? Van de rol. Ich zegk toch, eederein hat waal ins enne sjtrekkende maeter van dit of van dat nuedig, neet dan? En dat is hel wirke geblaoze, auch al kinste op elf hoëg baeter oet de veut mit sjtrekkende maeters es op d'r grond. Loupende maeters neume ze dat auch waal ins. Dao laeft Roza dus. Toch frappant dae naam. Midde tëssje de sjtrekkende maeters en dan kump ze soms pas tot rös es ze e uurke keske kint kieke. Zouwe luj die honger höbbe auch maoge sjtumme? Dat hat 't in zién daagbook gesjriëve naodat... wat waor dat auch al wir wat 't geziën haw? Referendum? Verkeezinge?

‘Pap, maoge luj die honger höbbe auch sjtumme?’

‘Wat is in dich gevaare? De mos nog get dekker mit dien naas vuer die kas gaon zitte!’

‘Zags dich get, sjat?’, reup de mam oet de kueke op häöre sjtrekkende maeter-man.

‘Nae, ich waor in michzelf aan 't kalle, noe good!’

‘Este dat wils...’ 'n Vrouw in de kueke hat waal anger dinger aan d'r kop, wèt eeder vrouw in de kueke. ‘Kiék mer daste diene kraom aafgerold kries, dalik is 't aete vaerdig.’

‘Maoge luj die honger höbbe noe sjtumme of neet, pappie?’ Kinger kinne lang aanhoute, wèt eederein dae kinger hat die lang aanhoute.

‘Kind, ich mot nog drie kilomaeter dropreeme liëvere op de kingerboerderie. Dao mot ich d'r kop vuer vriej höbbe, angesj vertèl ich mich. Gank mer nao mam, die hat mms, ich höb mer ambachsjoël.’

‘Mam, maoge luj die honger höbbe auch sjtumme? Pap zag

[p. 11]

dastich ms haws en hae mer ambachsjoël.’

‘Waor dae zich wir aan 't beklaage, mit zien “mer ambachsjoël”. Dat hae mer iësj ins zörgt dat hae die driehonderd kilomaeter dropreeme bie die kingerboerderie kriet. Wat zagste kind?’

‘Maoge luj die honger höbbe auch sjtumme?’

‘Wat is dat vuer e gevraog, woëvuer moste dat noe wir weite? Vilt die meisters nieks angesj in? Wat ze die kinger al neet vraoge op de sjoël. Ich mot wiejer kind. Es papa klaor is mot 't aete vaerdig ziën.’

Roza sjreef zich de vraog nog ins op, dujde ze in 'n plestik colaflesj en sjmeet ze van elf hoëg nao onger. Missjien wèjt die waal de zië in. D'r aafzender sjteit drop.

Roza Roller, p/a Lopende meter b.v. 11 hoog

Marijkelaan 413, Zweetberg.

Roza, zoë heisjt auch e vriendinneke van mich. Dat is sjterk. De zos zegke dat kint bienao neet toevallig ziën. Frappant is dat.

'n Naate äöf hat zich auch neet zelf gemak.