Sjweitberg (onder ps. G. Rapaille)

Aan d'r Feel is enne architect verlaore gegange. Meint hae zelf, terwiel zién collegaas gans get angesj meine, wat hae wir neet inzuut omdat hae in 't algemein ènne inlaef-faeler hat. De kins mit de ziël onger d'r erm aan de teek zitte, dat eederein zuut dat ze dich 't bètste mer get mit rös kinne laote. Wae dat neet zuut is Feel. Dae huiwt dich vrundsjappelik bekans van de krök aaf en begint e eige ei te legke. Dat meistal oet kump biej dat de vrouwluj 'm neet wille, terwiel hae toch geine onaeve man is.

‘Of neet?’ vreug hae dan. Da ruukt hae bie zichzelf onger de erm om flot vas te sjtelle dat hae toch auch neet nao sjweit sjtinkt. En al dae tied zits dich dao mit dién ziël onger d'r erm en dat kuuke hat nieks in de gate. Dat neume ze ènne inlaef-faeler.

[p. 57]

Nuujboewwiek

- 't Goud verrekt 't om te blinke. Pienlik kint d'r zoëmer ziën. Auch in Sjweitberg. Die nuujboewwieke dao... die höbbe get. Nuuj, frisj, zuuver. Geboewd esof 't nog dörp is. Mit d'r air van 'n sjtad. Tja. Zoën nuujboewwiek, ja... woë alles frisj, gereid vuer nuuj en angesj, liegkt te wachte op sjpannder laeve.

Dao valle noe de sjtraote oetein. Op 't woënerf sjtinkt 't op ein maol nao mès. Inins zint de verkiërsdörpele hindernisse gewoëre, woë enne alpinist zich nog sjiëne en knäök aan deit sjèlle. Zoën nuujboewwiek. Muurkes, moere, konifere en gevlochte hèkwerk. Geraffineerde houte aafzetconstructies die herinnere aan grensconflicte en aorlog. Op d'r tillevisie is dat waal ins te ziën, mè toch neet in Sjweitberg? Zoën nuujboewwiek, toch. Nommer 3 hingt de wesj oet es nommer 7 net gezellig wilt gaon barbekjoewe. Nommer 12 legkt zich lekker in 't zunneke... Oetgeraekend es nommer 14 wilt gaon sjpuite taege niëtele en ongeciefers. De nachsjiech van 13 mot zoë nuedig gaon sjnurke es 11 entelich tied hat om de sjilderiekes op te gaon hange. Betonne moer! Pak 't dich mer ins. Zoën nuujboewwiek. Nuuj, frisj, zuuver.

Pienlik kint d'r zoëmer ziën en toch zindert de hèts van hoes tot hoes. Vuer in en achter oet, auch op nommer 1a woë Tedje mit sjatje en kingersjiepsjap, gelöks-kesjtiële boewt. En auch op nommer 17 woë Lotte mit häöre sjattepoemel èn kiendjes aan e gezellig gezinslaeve breijt. Iërlik is iërlik en zoëmerse hèts keus gelökkig gein pertie.

Dees Sjweitberger nuujboewwiek is auch al de iësjte dinger kwiet. D'r insigste haan dae nog kriëde is durg 'n bewoënersactie d'r nak omgedrieëd, wat trouwes auch mit de kat van de widvrouw op 7 passeerde, me dan zonger dat enne actiegroep zich bekind maakde. Allein de hun zint hiej heilig. Van Heilige Pitbull pis Zalige Foemelpoedel.

Zoëmerse hèts en enne einzame maelder flöt zie leedje. 't Klinkt esof 't deerke zich vergis hat. Zoën nuujboewwiek. Zuuver, frisj, nuuj. Woë zint de kinger, woë zouwe de kinger ziën? Hat eine de kinger geziën? Geine paniek! Die zint op 't sjwumbad, of mit de opa en oma mit, of e paar waeke bie d'r pap, of e paar waeke bie de mam, of lekker gezellig mit hun twië-ouder-gezin nao e Land van Urges en Nurges. Daorom is 't zoë sjtil in de nuujbouwwiek en sjtilte kint zalig ziën. Sjtilte kint hiërlik ziën of neet? Sjttt...

[p. 58]

Tedje van 1a (twee-onder-een-kap) sjpiëlt teddybaer op 't verkiërde nummer. Gelökkig wèt dao gei miensj get van aaf en wae get weite wilt, vreugste wórom dat he dat wilt weite. Op dat verkiërde nummer grient Lotte aan Tedjes adres uever 't misse van häöre knuffelpartner, dae toevallig väöl aan ge werk is, mè dae al lang de zachte haore sjiene oetgevalle te ziën en woë 't de lètste jaore ummer lestiger mit hoeze is. Tedje begriep dat, Lotte grient. Tedje begriep. Lotte grient. Tedje grient. Lotte begriep. Lotte sjpint, Tedje auch. Tedje, Lotte, Lotte, Tedje, Ted, Lot...

‘Du, du allein kannst mich verstehen...’

't Is allemaol betrekkelik. 't Zal dich mer gebuere, wat, wae, wie? 't is aevegood betrekkelik sjtil in de nuujboewwiek. In 't gelöks-kesjtiël liegke teddybaerhaore, en d'r knuffelpartner zoog ze aan vuer die van d'r hond. Wat raar. Bie 't gezellig gezinslaevebreiwerk hat Lotte nogal get sjtiëke laote valle en meint noe dat 't knoupsläöker zint. Dat is raar. Mè maog die Lotte da neet van enne ridder druime? En worom zou Tedje van 1a neet maoge fantasere uever 't oetruffele van breiwerksjkes op 17? Dao hat eine van os toch nieks mit te make? Dat mot eederein toch zelf weite. Wat mot eine van os zich dao mit bemuje? Ssssjttt, sjwieg de moel!

'n Onwaer baove de nuujboewwiek! 't Sjandaalt en klatert! Huer! Baus! Dao vilt enne boum om! 't Klatert en 't hagelt en d'r natoer fluustert dat 't waal urges good vuer zal ziën. Es 't mer wir optrekt. Ja, 't trekt wir op, wat e gelök. Wuerd en zinne danse noe durg de sjtraot... 't Liéke waal sjpandeuk in de loch. Neume ze dit hallucinere? Wuerd en zinne uever verklemd ziën en ingte, vrieheid en loch. Uever duffe kraom en opgevraete ambitie, lekker sjpanning en fantastiese kanse. Uever doëdloupende waeg, advocaat, alimentasie, lebensraum en oetwaeg. Nonconfrontatie, uever same aangesjafte aafsjtandsbedeening, same onger de mat gevaegd gelök. Uever versjtopde traone en allegaasje, uever oetsjlaag en pien in d'r rök.

Zoën nuujboewwiek. Frisj, zuuver, nuuj. 'n Lètste buj sjpeult vergaete dinger de gäöt aaf. Die lètste buj sjpeult vergaete goodmake weg. Huer! Zach zinge sjtumme, ze klinke op oet de ruesterkes van 't riool. Zach zinge ze. Legk e

[p. 59]

oër te loestere! Ze zinge van hiël erg en väöl te erg en van verkiërde iëlt op de ziël. En van dat pien noe einmaol pien deit. En dat dae wat pien deit noe einmaol pien hat gedaon. En wae't deeg hat't gedaon. En boem is how! Dat is altied al gewae. En niekste sorry, hawste mer oet motte kieke. En wat hat enne van os dao mit te make. Botte, lompe iëlt op de ziël. Verdronke geweites. 'n Onwaer sjloekt alles op, mè worom wuert dit wir opgesjpuujd? Zou 't kinne daste 't onwaer neet zuus, este dich op inkele daag zon höbs blindgesjtaard? Zou 't kinne daste d'r bliksem neet huers es dien oër nao d'r raegebaog wilt loestere?

't Waor e versjrikkelik onwaer in Sjweitberg. In de nuujboewwiek vele de sjpeegels sjrieëwend van de moere aaf in doezende sjtöksjkes op d'r grond. Tja, gister koste nog sjtaonde kieke, leve miensj. Noe zulste dich motte bukke en doch dich get aan de veut! En doe reep ein deender, vanoet 't Gael Hoes: ‘Gaef de luj haop!’

Haop? O, ja! Oké, oké, oké. Sorry, beminde ingele, biej Blokker, Verlengde Vleisjsjtraot, zint dees waek de sjpeegels op d'r reclaam. Zoë good wie nuuj en pas ins in gekiëke. Pas ins in gekiëke en zoë good wie nuuj. Geweldig, hè? 'n Ganse opluchting. Auch leuk vuer die angere. De zuus, soms lost zich get vanzelf op. Höb ver toch nog gelök gehat. 'n Bietje gelök moste höbbe. De zuus, soms lost zich get vanzelf op. 'n Ganse opluchting. Höb ver toch nog gelök gehat. Geweldig, hè? Auch leuk vuer die angere.

E bietje gelök moste höbbe, neet?

Enne doë man aan de kaart

mot waal de buesj biej zich höbbe.