Het gulden cabinet van de edel vry schilderconst

[p. 445]

Cavailler Bernin
Italiaenschen architect, beldt-snijder ende schilder vanden paus.

T'Dry Constich-rijck verstandt van Bernin gans ontdeckt

Den Roomschen hoochsten roem in wetenschap besloten

Om dat hy Schilder is, Beldt-houder, Architect

Dry Consten die te saem in Bernin sijn ghegoten,

Volmaeckt in alle dry (soo datmen segghen mach)

Wie cost oyt aenden Paus een grooter gheest behaeghen

Als hy (die d'eelste van de Const brenght voor den dach)

Die weerdich is den naem van Cavailler te draeghen.

Een Daphne met Apol tot Room op seker Hof

Van eenen Cardinael, die gheven rechte reden

Dat Bernin desen naem verdient tot sijnen lof

Midts dien sy door Const soo levent sijn ghesneden.

En voor een wonderheyt des wereldts wordt beooght

Daer Faem noyt van en swijght in haere tongh te rueren

Om dat de schoonheyt van Natuer schier selver booght

Voor des' volcomen twee seer eel en fraey Figuren.

D'Architectuer daer by in menich rijck Paleys

Gheeft oock ghetuyghen om van Bernins lof te melden

Want sy en thoont niet als volmaecktheyt naer den eys

En daer by sietmen oock den gheest in sijne Beelden.