Geestigh liedt-boecxken

Een oudt Bestevaertje,
Met een iongh Meysjen.

Stem:
Pots hondert duysent slapperment.

L.

O Iannetje mijn soete beck!
Ey lieve blijft wat staen.

I.

Wat schortje? seght gy ouwe geck?
Ick raetje laetme gaen.

[p. 84]

 

L.

 

Al 't gelt dat ghy hier leggen siet,

 

Dat is voor u al ree.

 

I.

 

Wech kael-kop, ick en soeck u niet,

 

Dat ghy soeckt, soeck ick mee.

 

 

 

L.

 

2 Van landen, zanden, ghelt en goet

 

So ben ick machtich rijck.

 

I.

 

Dat acht ick niet, o suffe bloedt!

 

Ick wacht na mijns gelijck.

 

L.

 

Het goet is 't daermen wel of vaert,

 

Dus Meysjen weest ghedwee.

 

I.

 

Ghy sijt myn al te out bejaert:

 

Dat ghy soeckt, soeck ick mee.

 

 

 

L.

 

3 Och kijntjen geefje mijn een soen,

 

Ick geefje al dit gelt.

[p. 85]

 

I.

 

Dat sal ick wel een ionger doen,

 

Al gaf hy niet en spelt.

 

L.

 

Ghelooft lief dat ick u versoeck

 

Ter eeren en ter Ee,

 

I.

 

Wech, wech, wech Hansjen Hangebroeck:

 

Dat ghy soeckt, soeck ick mee.

 

 

 

L.

 

4 Ick sel iou koopen watje lust,

 

En doen wat jy ghebiet.

 

I.

 

Ey Lammert Vaertje houtje rust,

 

Want jy en dient men niet:

 

Waer jy maar twintich iaren out,

 

Misschien of icket dee:

 

Maer nou so sydy out en kout:

 

Dat ghy soeckt, soeck ick mee.

 

 

[p. 86]

 

5 Dit is een Lansjen na mijn sin,

 

Vol vrolijckheydt en vreucht,

 

Die ick niet om sen goet bemin,

 

Maer om sijn ionghe ieucht:

 

V krachten die zijn out en af,

 

Dus laetmen in mijn vree:

 

En vryt gheen Vryster, maer een Graf:

 

Dat jy soeckt, soeck ick mee.

 

 

 

L

 

6 Mijn Dochter laet dees mellick-muyl,

 

En neemt een deftich man.

 

I

 

Och nam ick sulcken ouwen uyl,

 

Wat raedt gingh my dan an?

 

'k Sou immers by u levend' lijf,

 

(Waer vintmen meerder wee?)

[p. 87]

 

V Maecht sijn, en u Weeuw', jou Wijf:

 

Dat jy soeckt, soeck ick mee.

 

 

 

7 Vaert wel dan ouwe Rochelaer,

 

Ick blijf by mijns ghelijck:

 

Weet jy niet salighe Bestevaer,

 

Dat Wie genoeght is rijck?

 

L

 

Ey staet toch stil, God segen ongs,

 

Verhoort doch dees mijn bee.

 

I

 

Ay Lammert-vaer, jy soeckt wat iongs:

 

Dat jy soeckt, soeck ick mee.