Officia Ciceronis, leerende wat yeghelijck in allen staten behoort te doen, bescreuen int Latijn

Vande bequaemheyt, soo wel inden dingen ons vander fortune verleent, als inden dingen die wy ons self door eyghen oordeel aenghenomen hebben.
Het xliiii. Capit.

Tot die twee voorgenoemde personen wert somtijts, of door eenich geual, oft door gelegentheyt van tijde, een derde geuoecht: oock mede wel een vierde persone, daer wy ons door eyghen oordeel toe schicken. Want concrijcken, heerschappien edelheyt, eere, rijcdomme, ende de dingen die dees contrarie zijn, hangen in tgheluck ende werden vanden tijde geregeert: maer wat personagie wy spelen willen hangt aen ons selfs: want sommighe begeuen hun totter Philosophien, anderen tot de rechten, anderen tot welsprekenheyt, andere tot andere consten daer inne elck meest begeert vermaert te werden. Doch soeckense veel al prijs ende waren gaerne wtnemende in

[fol. 45v]

tghene daer haer ouders inne ghepresen zijn gheweest. Also sochtse P. Mutius inde rechten, ende Africanus de sone van paulus in crijchshandel. Sommighe vercrijghen ende voeghen noch eenighe eyghen lofwaerdicheyt tot de eere die si van haer ouders ontfangen hebben: als dese selfde Africanus, die zijn ridderlick lof met welsprekenheyt vergroote. Het welck ooc mede Timotheus de sone van Conon ghedaen heeft: die in ridderlike feyten niet minder zijnde dan zijn vader, zijn lof ende glorie oock met een edel verstant ende geleertheyt vermeerde. T ghebuert oock somwijlen, dat eenige verlatende den handel huerder ouderen, huer selfs voornemen ende maniere volgen: ende dit meest inden genen die van cleynder afcomst zijnde na grootheyt staen. Alle twelcke wy (die tbetamen soecken) met hert en sinne wel behooren te aenmercken.