Officia Ciceronis, leerende wat yeghelijck in allen staten behoort te doen, bescreuen int Latijn

VVat een regeerder, burgher, ende vreemdelinck betaemt.
Het xlviii. Capit.

Hier en dient oock niet qualick yet gheseyt te werden hoe hem een regent, een borgher, ende een vreemdelinck draghen sal. Alsoo eyscht eygentliken de dienst last oft state van eenen regeerder, dat hy hem versta te presenteren oft te dragen de persone vander stede daer hy regeert: ende dat hy des stadts waerdicheyt ende eere behoort te bewaren, de wetten te onderhouden, willekueren te maken, ende te gedencken dat hem dese dingen toe betrout ende beuolen zyn. Maer den burgher betaemt onder een ghelijck recht met zyn medeburghers te leuen, hem selfs niet te verwerpen

[fol. 49r]

oft verachten, noch oock te verheffen, ende niet te willen onder de gemeente dan dat vreedsaem ende eerbaer is: want sulcdanighen plachtmen voor een goet burgher te achten. Maer de vreemdelinghen oft inwoonders en behoren hun buyten haer selfs dinghen geen dinck te onderwinden, niemants saken te ondervragen, ende met allen gheen ondersoeckers te wesen in een vreemde stadt. Alsoo vintmen dan by nae de officien oft betamelijcke daden alsmen vraecht wat behoorlick is, ende wat na gheleghentheyt der personen, tijden ende iaren bequaem is. Maer daer en is niet dat so sere behoort, als in alle ons daden ende beraden stantuastich te wesen.