Officia Ciceronis, leerende wat yeghelijck in allen staten behoort te doen, bescreuen int Latijn

Slotreden.

Hier hebdy lieue sone Marce, een ghifte van v vader die seker (mijns bedunckens) groot is: maer si sal v zijn, na dat ghijse

[fol. 142r]

ontfanghet. Hoe wel v dese drie boecken oock onder de leeringen ws meesters Cratippi, als gasten te ontfanghen staen. Maer waer ic selfs tot Athenen gecomen (twelc gheschiet ware indien my tvaderlant midden wt mijn lope met luyder stemmen niet wederomme geroepen en hadde) ghi sout mijn leeringen ooc onderwijlen gehoort hebben. Nv dan mijn stemme in dese drie boecxkens tuwaerts gereyst is, so suldijer soo vele tijts na luysteren als ghy sult moghen: maer soo vele suldy mogen, als ghy selfs sult willen. Ist dat ick v mercke lust te hebben in dese wetenschappe, so sal ic onlancx (so ick hope) teghenwoordich ende ooc afwesende int afwesen met v spreken. Vaert wel mijn lieue Cicero, ende maect v seluen vryelijcken vroet, dat ick v bouen alle dinghen beminne: maer dat ick v noch lieuer sal hebben, indien ghy v in dusdanige onderwijsingen ende leeringhen verblijt.

Eynde vant derde ende laetste boeck der Officien Ciceronis.