Het groote liede-boeck

Een corte Forme des Ghebedts, over den genen die bereyt zijn om te trouwen, met aendachtiger herten te spreken.

O Heere ghy almoghende barmhertighe Godt, naedemael ghy door uwe eeuwighe wijsheydt ende goetheyt hebt ingesien, dat het niet goet en zy, dat de mensche nae uwen beelde gheschapen, alleen zy, maer hebt hem in den beginne een behulp (die vrouwe uyt sijnder ribben ghemaeckt) gegeven, tot vermeerderinghe des menschelijcken geslachts ende alle onreynicheyt te vermyden, dese heylighe Echte inghestelt. Die welcke oock u lief kint Iesus Chri-

[fol. Kkk6v]

stus gereformeert ende bevesticht heeft. Om sulcx nae uwen Godtlijcken wille te beginnen ende te bevestigen, staen dese bereyt voor u o Godt. Doet oock ghy die oogen der barmherticheyt open, wiltse doch, o Godt, ghezeghenen ende ghebenedyen, ende haer uwe Goddelijcke genade verleenen. Dat doch hare herten ende ghemoeden, met den voornemen in u alleen moghen gerichtet zijn, uwe Goddelijcke eere alleen te soecken, ende die salicheyt haerder zielen. Datse doch also het den heyligen betaemt, dese Echte oprechten ende onderhouden, ende voor des duyvels temtacy moghen bewaert worden. Ende datse in alle cruys, lyden ende aenstaende noot, haer in desen stant ontmoetende, uwen godlijcken troost mogen ghenieten. Dit bidden wy u, o Godt ende Vader, voor haer door uwen lieven ende beminden Sone Iesum Christum onsen Heere. Die ons in allen aenglegghende nooden heeft leeren bidden:

Onse Vader, etc.

Heer wiltse doch voor alle quaet bevryen,

Ende met hemelschen goederen ghebenedyen.