Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Dingeman krijt wjukken (1999)

Informatie terzijde

Titelpagina van Dingeman krijt wjukken
Afbeelding van Dingeman krijt wjukkenToon afbeelding van titelpagina van Dingeman krijt wjukken

  • Verantwoording
  • Inhoudsopgave

Downloads

XML (0.24 MB)

tekstbestand






Genre

jeugdliteratuur

Subgenre

roman


In samenwerking met:

(opent in nieuw venster)

© zie Auteursrecht en gebruiksvoorwaarden.

Dingeman krijt wjukken

(1999)–Eppie Dam–rechtenstatus Auteursrechtelijk beschermd

Vorige Volgende
[pagina 141]
[p. 141]

Haadstik 32
Asto in fûgel wêze mochtst

‘No moat it kopke derby, Dingeman,’ sei Joazef doe't we de stêd yn rieden. ‘Do joust iderkear rjochting oan. De teugels tusken de fingers fan de iene hân, dan kinst de oare hân útstekke.’

It wie drok yn 'e stêd. Joazef ried safolle mooglik rjochts. Soms hienen we beljende fytsers en brommers achter ús oan, mar hy feroare der net fan.

As in ljocht op read stie, luts er kalm oan de hânrem en wachte geduldich op grien. Ik koste iderkear even muoite om wer op gong te kommen, mar dêrnei gienen we like soepel troch it ferkear as wetter troch in beekje.

Op it lêst rieden we oer de brede kade fan in haven. Der wie in grut kanaal mei frachtskippen, dy't oan 'e kant leinen en fêstsieten mei swiere kabeltriedden. Op 'e wal seach ik stellaazjes, trechters, takels en kranen.

‘Hooo, Hoppe!’

Joazef luts de karre op 'e rem en stapte út. Hy wappere mei de earms en skodde mei de skouders. Seare spieren. Doe tilde er my út 'e gatsjepanne. Ik suchte fan de spanning.

‘Hjir mei ik sneons graach wêze,’ sei Joazef.

We gienen op 'e râne fan de kade sitten. Fjouwer fuotten bongelen boppe it wetter.

‘Al dy frachtskippen mei har grutte liven,’ sei Joazef, ‘al dy kranen, sa heech en sa kalm, dy âlde pakhuzen - prachtich. Mar ek sokke nije loadsen fyn ik moai om te sjen. Myn eagen krije hjir sêd.’

[pagina 142]
[p. 142]

‘Komst hjir alle sneonen?’

‘Ek wol troch de wike, want dan krijst noch wolris wat: sân, grint, in partijke hout.’

‘Sjoch, dêr komme einen oan,’ sei ik.

Joazef lake.

‘Se kenne my wol. Of net, jonges.’

Hy krige bôle út 'e tas. We makken der lytse stikjes fan, dy't we ien foar ien yn it wetter saaiden.

It duorre net lang, doe hienen we ek seefûgels by ús. Se lutsen sirkels yn 'e loft en dûkten dan ynienen nei ûnderen, midden tusken de einen yn.

‘Moatst se fuortjeie, Joazef.’

‘Och, God hat net allinnich einen makke.’

Hy smiet de lêste bôle yn it wetter. De seefûgels pikten alles op. Fuort dêrnei wienen se wer fertokken. De einen swommen rûntsjes om te sjen of ergens noch in koarstje dreau.

‘Asto in fûgel wêze mochtst,’ sei ik, ‘watfoar fûgel woest dan wêze?’

‘Alle fûgels wol, want in fûgel is himsels.’

‘Nee, dat is gjin antwurd. In fûgel neame.’

‘No, in ielskolfer dan. Dy sjocht derút as in swerver, krekt as ik.’

‘Mar dan bist wol in fûle rôver.’

‘Ja, dan dûkte ik it wetter yn, en alle fisken dy't ik krije koe, friet ik op.’

‘Wat in gemiene fûgel bisto.’

‘Net as ik in ielskolfer bin. Moat ik dan yn it park omstappe en gers haffelje? Mar dan bin ik in ein.’

‘Wolst gjin ein wêze...’

‘Ja, ek wol. Mar dan in wylde ein, net sa'n sleauwe fiverswimmer. En watfoar fûgel soesto wêze wolle?’

[pagina 143]
[p. 143]


illustratie

[pagina 144]
[p. 144]

‘In trekfûgel. Dan gie ik út it noarden wei hielendal nei it suden. Nei in lân mei gers en blommen, wetter, beammen, blauwe loften en alle dagen sinne.’

‘Mar dan moatst ek werom.’

‘Nee, want dan wie ik gjin trekfûgel mear. Dan soe ik ynienen in bliuwfûgel wêze.’

‘Wat in fantasyen,’ lake Joazef. ‘Wy ha neat te fleanen, wy binne minsken.’

De einen wienen yntusken fuortswommen, se wisten dat der neat mear te heljen wie.

Joazef rommele yn 'e tas en helle der in kaart út. It wie in plattegrûn fan de stêd. Hy tearde him iepen en lei him by ús beiden op 'e skoat.

‘Hjir sitte we, Dingeman. Do en ik, moatst sjen. Fynst it net in aardichheid? En hjir moatte we aansent hinne. It winkeltsje mei âlde boeken.’

‘Bist dan net bekend yn 'e stêd?’

‘Jawol, mar we binne net yn 'e auto. Ik wol der wis fan wêze dat we it koartste paad nimme. We krije noch in hiele reis werom, en ik fiel de earms no al.’

‘Oars wol ik aansent wol wipwapje, hear,’ sei ik, mar Joazef hearde my net.

‘Sjoch,’ sei er, ‘we kinne it bêste dit steechje nimme, dan komst yn dizze strjitte út. En dan hjir sa om dit tsjerkje hinne, de bibleteek, it swimbad, sa achter dizze skoalle lâns, it postkantoar foarby, en dan kinne we dêr de karre parkeare. Sjochst wol, hjir stiet in P.’

‘Dy skoalle,’ sei ik, ‘is dat in basisskoalle?’

Joazef seach achter op 'e kaart.

‘Ja, basisskoalle Op de Wieken.’

‘Is it in leuke skoalle, tinkst?’

[pagina 145]
[p. 145]

‘Dat wit ik net. Wat fynsto in leuke skoalle?’

‘No, net in pestskoalle yn elk gefal.’

‘En wat is in pestskoalle, neffens dy?’

‘In skoalle dêr't alle bern itselde wêze moatte.’

‘Hoe bedoelst?’

‘No, by ús yn 'e groep moatst fan horrorfilms en grizelboeken hâlde, oars kinst net meidwaan. Mar ik fyn se oerdreaun en flau. Soms tink ik dat ik de iennige bin dy't is sa't ik bin.’

Joazef knikte. Hy prakkesearde.

‘Ik wit net of it hjir wol oars is,’ sei er. ‘Mar kom, we moatte hjirwei.’


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken