De warachtighe fabulen der dieren

[p. 96]

[Paeu ende Acxtere]

Wijs voorzienich t'allen fijne

Behoort een ouerhooft te zijne.

Eccle. 10.

EEn Coninck die onwijs es, gheopenbaert
Alsulck een, zijn volck bederuen sal
Ende die steden sullen werden bewaert
Door t'verstant van een die voorsienich is al.

Eccle. 7.

VErzouct Rechter te zijne, te gheenen steden
Ten zy dat ghy machtich zijt
Omme metter macht, die boosheden
t'Duerbrekene, end' v daer wel in quijt.

[p. 97]

Paeu ende Acxtere.

DE Voghelen der lucht, ende oock inder eerden
Eenen Conijnck begheerden
Den ghenen diet best zou te zijne betamen
Yeghelick wasser ghecropen, hoe cleen van weerden
Elcx zin hoorende, zouden zy t'beste aenveerden
Dies op een wijdt veit was t'generael verzaemen
Wt allen houcken zy daer ghevloghen camen
Ende wesende by een (eerst wiert gheaccordeert)
Den Paeu schoon op ghestreken, zey dat zy hem namen
Coninck t'zijne, heeft hem zeluen ghepresenteert,
Die hoogh staet begheert, dicwils zijn selfs val causeert.

¶ De Voghels dit aenhoorende int generale

Ghauen last dat d'Acxtere zou voeren de tale
Antwoorde den Paeu, clouckelick doe ter tijt
En sprack, wy zullen v hommayge doen by speciale
Indien ghy v vroom ghenouch kent (zoo wy hopen ghy zijt)
Ons voor den Arendt beschermen, die ons voert strijt
En voorzienich, wijs, discreet zijt, alst noodt ghebiedt
Op dat ghy en wy al tsamen moghen wesen bevrijdt
Op dees conditie men hem t'officie liet,
Den man weet dicwils voorzien, maer t'officie niet.

Bewijsende dat niet es ghenouch alleene

Een hueuerhooft t'hebben schoon ghelaetich in zeden
Maer een wijs discreet ouer al ghemeene
Verschiet met gheschicte voorsienicheden,
Om te houden zijn ondersaten in vreden:
Ieghens die hemlieden souden moghen deeren
Die medelijdende is, ghebruuckende reden
Om de goe te beschermen, en de quaetdoenders te weeren,
Zommich Herder pacht de Schapen, om t'wulle scheeren.