Tondalus' visioen en St. Patricius' vagevuur (2 delen)

van eenre mueren die silveren was

DEse muere was silveren ende seer clare. ende schone. Mer sij en sach daer gene porten an. Nochtant en wiste sij niet. hoe hoer die moegentheit gods daer in leide Ende sy sach al omme. ende sach der heiligen [chore] verblidende mit god seggende. Gloria si dij god vader Gloria sij di god soen. gloria si di god heilige geest Ende daer songen mannen ende wiven die waren ghecledet mit preciosen witten clederen Ende waeren herde schoen sonder smette. ende sonder rimpe. Vrolic, verblidende ende vervrouwende altoes Guedertieren inden love der heiliger ewiger drievoldicheit Ende die wytheit

[fol. 160d]

van hoeren clederen. was als nye vallende snee. daer die sonne op schint. Ende die manigerhande stemmen die te gader songen gaven suet gheluyt. Hem allen was een gelike claerheit, vroude, mynnentlicheit, blijtscap, schoenheit. eersamheit, ghesontheit. ewicheit Eendrachticheit ende caritate Mer wat sal ic seggen vanden rueke deses veldes daer dese in waren. Want dese rueke gaet boeven alle rueke ende specien. die alte [...] suete ende ghenoechlic roeck Daer en was nacht noch droefheit Ghecleedet

[fol. 161a]

mit mijnnen waren sij heet Doe sprac die ziele. Ic bidde dij here dattet di lief sij. dat wij in dese ruste bliven. Die engel antwoerde: Wael moet dij sijn Al schijnen dese groet nochtant saltu meerre lone der heiligen sien Die ziele sechde Here, welker ziele lone sijn dit Die [...] engel sechde Der geenre die in echtscap sijn, der mannen ende der wijven. ende hoer echtscap mit overspoel niet en besmiten Ende oec hoer ghesinde wael regieren naest hem selven Ende hoer tijtlike guet den armen. ende den pelgheren. ende der kerken cristi mede deilen Tot desen sal

[fol. 161b]

die gerechte richter seggen inden dage des ordels Comt ghebenedide mijns vaders. besittet rijcke dat u bereit is van beghijnne der werelt. Want ic had honger ende ghi gaeft mij teten Ic was dorstich ende ghi gaeft mij drincken Ic was ellendich. ende ghi [...] herberchden mij Die ontbeidende die heilige hope ende die tocoemste vander glorien des groten gods [...] werden sij vertroest in deser rusten verblidende sonder einde

Ende hi sechde tot hoer Wij moeten noch opwart gaen ende besien die blijscappen die daer sijn Die ziel sechde Here,

[fol. 161c]

heb ic gracie vonden in dijnen ogen. soe doe mij blijven in deser rusten. Ic en wil niet hogher opwart gaen oft dijn sij. Want mij ghenoeget hier herde wael te blijven Ic en suecke noch ic en rueck, noch en begeere bet te hebben Die engel sechde. Al en hebstuus niet verdient. nochtant saltu meere blijtscap sien dan dese. Ende hier om ghijngen sij voert. ende arbeide niet voel want ten docht hem geen arbeit Ende hem allen daer sij doer ghingen in alle den scharen. mit gheneichden hoefden. mit bliden ansichten. ende mit groter blytscap

[fol. 161d]

quamen sij hem toe moeten Ende noemende myt hoeren name. soe gruetende sij se ende danckten gode die sij verloest had ende sechde. Lof sij di koninc der ewiger glorien. Here die niet en wil den doot des sunders mer dat hi leve ende bekere. Die om dine grote barmherticheit geweerdicht heves dese ziele te verloessen vander pinen der hellen Ende die te versellen mitten gheselscappen dijnre heiligen