De achtste reghel.
ISt sake dat u de temtatie ende becoringe swaerlicken beroert ende aencomt, so en wilt daerom terstont u selven niet mishagen ende verslaen, alleens oft God na u niet en vraechde noch en achte, om dat ghy weynich goedertieren ende niet volmaeckt en zijt. Laet u dat niet lastich wesen ende vervaren, maer wilt God daer af grootelijcken dancken dat hy u acht ende leert als een toecomende erfghenaem, ende castijt u als zijn liefste soon ende hy u ondersoeckt als een vrient. Daer en is geen meerder teecken dat een mensche verworpen is van die barmherticheyt Gods dan als hy niet belast ende aen ghevochten en wordt met temtatie. Laet u ter herten gaen dat Sinte Paulus die daer weerdich was te comen inden derden Hemel, nochtans ghetemteert is vanden Enghel Sathan. Laet u voor comen den Heyligen Propheet Job, Sinte Hieronimus, Sinte Benedictus, Sinte Franciscus, ende behalven dese noch ontallijcke veel van onse Voorvaders ende heylighe mannen, die daer al getemteert hebben geweest met groote sonden. Ist sake dat u lijden met veel menschen ende met al sulcke Heylighe mannen ghemeyn is, waerom wilt ghy den moet overgheven, wilt veel liever arbeyden op dat ghy met haer meucht verwinnen, ende God die en sal u niet verlaten, maer hy sal u geven door die temtatie alsulcken moet ende voorspoet dat ghyse lichtelicken sult lijden ende verwinnen.
Auteursrechtvrij