Archives ou correspondance inédite de la maison d'Orange-Nassau (première série). Tome I 1552-1565

Lettre LXXXVI^d.
Viglius au Cardinal de Granvelle. La Gouvernante incline à réunir les Etats-Généraux (MS. B. GR. XII. p. 274).

Monseigneur!... mon pourtement est à l'accoustumée et selon le aige, qui nécessairement amène la déclination, et ne suis sans craincte de demourer avec une fistule à la jambe... Et ce non obstant je continue tousjours mon service, le mieulx que je puis, avec non moindre peine du cueur que du corps, selon que je vois aller le monde, et m'est ung jour de votre absence ung mois et sents extrêmement la métamorphose que je vois, sans espoir du remède, sinon en mon particulier de quiter la place et de me tirer hors ceste servitude, puisque je le puis faire avec si bonne couleur, et ne pense point que j'auray du costel de son Alt. si grand empeschement vers sa Ma^t comme l'aultre fois,

[p. 269]

⁺quant elle avoit encores mon service agréable, mais s'estant à présent rengée de tout d'aultre costel, à ce qu'on peut juger du visaige, l'on me verra voulontiers envoyé, ce que m'apperceuz ces jours passez par les mines qu'elle monstroit, me voyant sustenir l'opinion qu'elle mesmes avoit aultre fois trouvé bonne, de non mettre les Estatz ensamble par communication générale; laquelle question venoit à propos, pour persister les Estatz et Nobles sur l'accord de l'entretènement des garnisons en leur précédente opinion, de trouver les moyens de furnissement des deniers par la commune délibération des Estats-Généraulx: et combien que je réprésentois ce que sa Ma^t avoit dernièrement respondu sur ce poinct avec les raisons aultrefois considerées, mon opinion n'estoit aucunement recevable, et, voyans les aultres l'inclination de son Alt., fut résolu que le chancellier de Brabant debvoit remonstrer aux dits Estatz et Nobles ce que v.i.S. verra par le double icy joinct; ainsi est la planche jà mise et je tiens que sa Ma^t, espérant par ce moyen se descharger, les laissera faire, et encoires avec cecy je crainds que l'an sera passé, avant que les souldarts et garnisons recevront deniers aultres que le prest que son Alt. leur a faict et ceste nécessité sert de tortionaire pour consentir ladite communication générale... Il fault laisser passer cette nue, et quelque jour reverrons le soleil. Nostre Seigneur a doué v.i.S. de magnanimité et prudence pour andurer l'iniquité des malvueillans et pourveoir à leurs machinations, et, facent-ilz ce qu'ilz veullent, si ne sçauront-ilz oster de coeurs des gens de bien l'opinion qu'ilz ont de voz vertuz et mérites pour l'avancement du service de la République.... Bruxelles, 29 juing.

+ 1564. Juin.