Archives ou correspondance inédite de la maison d'Orange-Nassau (première série). Tome I 1552-1565

Lettre CV^a.
Viglius au Cardinal de Granvelle. Il déconscille la publication à Anvers d'un livre sur les affaires de la religion en France (MS. B. GR. XVII. p. 262).

Monseigneur, j'ay veu le livre v.S.i. désire faire imprimer par Sylvius en Anvers, et l'ay leu bien volontiers, lequel, selon que les affaires sont disposez en France, me semble illecques estre bien à propos, mais, à correction, en ung pays où les choses ne sont poinct encoires si avant, je craindrois que ceste liberté de remonstrer et débatre les délibérations des Princes, ne feroit guerres de bien; ains, comme aucuns y enclinent de eulx-mesmes, ilz penseroient leur estre licite de faire le semblable et contre noz Placcards, Ordonnances, et provisions, alléguer leurs griefz, et se mesler du publique plus avant qu'il ne convient. Aussi ne me plaist poinct l'opinion de l'aucteur qu'il ne faille plus user de punition contre les héréticques et c'est ce que plusieurs chercent, et s'ilz gaignent ce poinct, actum est de relligione catholicâ; car, comme la pluspart

[p. 371]

⁺de peuple sont sotz et ignorans, qui se laissent facilement séduyre par la subtilité des hérétiques, et que chascun est adonné à la liberté, y joincte l'ancienne hayne contre les gens d'Église, ilz feront bien tost la plus grande partie, si par les loix et craincte des poines ilz ne sont contenus au bon chemin; et les argumens qu'il ne conviegne poinct admectre deux religions en une république, sera retorqué contre les Catholiques par les Huguenotz, qui ne les suffriroient poinct avec eulx, comme l'on voit à Genefve et ailleurs, où ilz pensent estre les maistres et plus fortz; parquoy, comme le livre s'imprimeroit en Anvers et viendroit en plusieurs mains de gens de pardeçà, je n'oserois prendre sur moy d'admectre icelluy, de tant plus qu'il est sans aucteur, qu'est contre noz Ordonnances, et ores qu'il contiegne beaucoup de bonnes choses, ce qui est melsé pourroit tant plus facilement faire trébucher ceulx qui ne sont assez fermes en la foy, et enhardir les mauvais, soubz l'auctorité de telz livres imprimez avec congié et licence de la Court; néantmoins, si v.i.S. persiste, je luy supplie d'estre content de le pouvoir mectre en délibération du Conseil, où l'on peult-estre ne fera tant de scrupule, veu qu'i en a qui vouldroient qu'on ne usast plus de rigueur et ne trouvent mauvaises les remonstranses qui contre inquisition et placcartz jà commencent trop estre usitées... Bruxelles, ce 27 avril.

+ 1564. Avril.