Archives ou correspondance inédite de la maison d'Orange-Nassau (première série). Tome IV 1572-1574

* Lettre CDLII.
Le Prince d'Orange au Seigneur de Lumbres. Il le prie de se règler d'après les instructions qu'il recevra des Comtes de Nassau ses frères.

Monsieur de Lumbres. Depuis mes dernières du xiij^e

[p. 249]

⁺jour⁽¹⁾ de ce mois, me sont venues deux lettres vostres, l'une du 26^e du passé et la seconde du 10^e du présent. Je vois le soing que vous avez au bien de ceste cause, joinctement voz bonnes diligences à me donner si particulier advis des occurences qui vous viennent; vous en remerchiant d'une bonne volunté, avecq assurance que je tiendray toujours à plaisir et service bien aggréable si vous continuez la mesme trace, comme je me confie que le ferez, oires que n'en soiez icy admonestez. Je vous ay escript par ma précédente que, d'aultant que je suis si esloigné de vous, vous pourrez pour mellieure accélération de tous affaires et aussy pour plus grande seureté, traicter de toutes choses avecq Messieurs mes frères; et je vous en prie aultre fois par ceste et aussi, si l'occasion s'offre, que, à la requeste de mon frère le Conte Louys, vous veuillez aller en France. Vous m'y ferez aultant de service que si c'estoit par ma charge propre; me remectant du tout à ce que à la requisition de mon dit frère vous besoignerez par delà, bien asseuré que n'espargnerez aulcun bon office qui puisse servir à l'advanchement des affaires communes. Je suis esté bien aise qu'avez désabuzé ceulx des églises de par delà des bourdes que leur a faict entendre Zacharias van Glissenberger, et ne scay d'où luy est prins telle hardiesse, si ce n'est qu'il se sert d'une vielle commission mienne, par laquelle je l'aurois pendant le siège de Haerlem estably couronel de cincq enseignes, à l'instance de feu Mons^r de Batenburch, laquelle commission a depuis esté cassée. Des nouvelles n'avons icy aultres, seullement que l'ennemy demeure en-

+ 1573. Novembre.

(1) XIII^e jour. La Lettre 450.

[p. 250]

⁺coires és environs d'icy, ruinant le plat païs, mais j'espère qu'il ne nous pourra prévaloir d'aulcune place d'importance. Et sur ce n'estant ceste à aultre effect, je supplieray Dieu vous donner, Mons^r de Lumbres, en bonne santé, heureuse et longue vie. Escript à Delft, ce xxj. jour de novembre 1573.

Vostre bien bon amy à vous faire plaisir et service,

Guillaume de Nassau.

A Monsieur Mons^r de Lumbres, mon bien bon amy, à Couloingue.

+ 1573. Novembre.