Archives ou correspondance inédite de la maison d'Orange-Nassau (première série). Tome IV 1572-1574

† Lettre CDLXI^a.
Le Prince d'Orange au Seigneur de Noircarmes. Il l'exhorte à employer son influence pour la pacification des Pays-Bas.

Monsieur, par une lettre que, de la prison du chasteau d'Utrecht, m'a escript Monsieur de St. Aldegonde, le iiij^e jour de ce mois, il me dict entre aultres particularitez d'avoir veu en vous une bonne affection au bien et repos de ce pays, et qu'il espère, voire n'en faict nul doubte, vous vous employerez très voluntiers et fidellement pour intercéder vers Sa Majesté, et trouverez voye à quelque

[p. 301]

⁺bon appoinctement, qui soit au contentement de sa dite Majesté et de ses pouvres subjectz. Sur quoy j'ay bien voulu vous faire ceste, pour vous dire qu'il seroit esté bon que vous et tous aultres qui en ont les moyens, eussiez, passé long temps, faict si bons et vertueulx offices, affin que tant de gens de bien, bons et loyaulx subjects de Sa Majesté de toutes qualitez eussent peu estre préservez des calamitez et misères où l'on les a veu tomber. Et toutesfois estant meilleur de le faire tard que jamais, je vous prieray bien affectueusement que, suyvant le bon espoir que me donne le dit Sieur de St. Aldegonde, veuillez intercéder vers Sa Majesté selon le bon crédit que j'espère vous avez, et trouver voye à quelque bonne et asseurée paix, laquelle soit à l'advanchement de la gloire de Dieu, service et contentement de Sa Majesté, et au bien et repos de ses subjectz, afin que par ce moien ilz puissent cy-après vivre [ès] leur ancienne liberté, franchises et privilèges. Et affin que vous puissiez tant mieulx veoir noz justes doléances, raisons, et conclusions, je vous envoye icy joinct certain escript⁽¹⁾ que, par forme de supplication au Roy, moy et les Estatz de ce pays avons puis naguerres faict imprimer afin que tout le monde en pourroit estre informé, et surtout qu'il vinst aux oreilles de Sa Majesté, puisque tout accès devers icelle nous est défendu. En quel endroict, après, d'une bonne affection, vous avoir remerchié de la courtoisie dont vous uzez à l'endroit le dit Sieur de St. Aldegonde, comme une aultre lettre sienne me tesmoigne, je suppliray Dieu vous octroyer, Monsieur, tout ce que pour vostre salut vous

+ 1573. Décembre.

(1) escript. Voyez p. 298.

[p. 302]

⁺convient. Escript en la ville de Ziericxzée, le xxiij^e jour de décembre 1573.

Vostre bien bon amy à vous faire service,

Guillaume de Nassau.

+ 1573. Décembre.