Archives ou correspondance inédite de la maison d'Orange-Nassau (première série). Tome VIII 1581-1584

* Lettre MCLXX.
La Princesse d'Orange au Comte Jean de Nassau. Elle se recommande en ses bonnes grâces.

Monsieur mon frère, j'ay senti si avant et sen' encores l'affliction qu'il a pleu à Dieu m'envoyer, que j'ay oublié tout debvoir vers mes parens et bons amis, ne me donnant la tristesse aulcune relasche, ny loisir de penser à aultre chose quelconque. Je vous supplie donc, Monsieur mon frère, de m'excuser, si jusques à présent je ne vous ay escrit aulcunes lettres, comme je cognoy que c'estoit mon debvoir; mais je n'ay sceu encores penser ny à cela, ny à quelconque aultre affaire de ce monde, et vous supplie de

[p. 448]

⁺rechef que ce mien défault n'empesche la continuation de la bonne amitié que je sçay qu'il vous a pleu de me porter, pour l'amour de feu Monseigneur; et comme maintenant ceste pauvre famille, tant moy que touts les enfans, n'avons en ce monde aultre père que vous, aussy je vous prie bien humblement de nous vouloir en nos affaires monstrer vostre affection paternelle, et espère que Dieu me fera la grâce de vous rendre telle obéyssance toute ma vie, que je ne donneray occasion à ceste bonne amitié qu'il vous plaist de nous porter, en façon quelconque diminuer. Surquoy, m'estant bien humblement recommandée à vos bonnes grâces, prieray Dieu, Monsieur mon frère, vous maintenir en Sa saincte garde. A Delff, ce 26^e de julet 1584.

Vostre¹ bien humble et obéissante seur à vous fayre service,

Louyse de Coligny.

+ 1584. Juillet.

1 Vostre - service Autographe.