Archives ou correspondance inédite de la maison d'Orange-Nassau (première série). Tome VIII 1581-1584

Lettre MCLXXVI.
La Princesse d'Orange au Comte Jean de Nassau. Réponse à la Lettre 1168.

Monsieur mon frère, j'ay receu les lettres qu'il vous a pleu de m'escrire, par le messager qui vous avoyt esté envoyé par les Sieurs du conseil de feu Monseigneur. Je vous remercie bien-humblement, non seulement des honnestes offres qu'il vous plaist de me faire et pour le regard de mon fils, je prie Dieu qu'il Luy plaise nous faire la grâce à tous deux, de vous faire en récompense humble service; mais je me sens beaucoup d'avantaige vostre obligée pour les bonnes et fructueuses consolations que vous me faictes, tant pour sentir par icelles combien ceste calamité commune vous touche en particulier, que principalement pour le fruict et instruction que j'en ay receu,

[p. 470]

⁺car comme je n'ay jamais senty ung si grand mal, aussy je vous confesse, Monsieur mon frère, que j'ay eu bien besoing de consolations extraordinaires, et comme vous estes celuy qui touchez de plus prests à feu Monseigneur, aussy je n'ay receu de personne meilleure instruction que de vous; je prie Dieu qu'Il me la face profiter. Je ne vous escrits rien touchant les affaires de ceste maison, ny pour les miennes en particulier, car j'en ay communicqué suffisamment avec les Sieurs, présents porteurs, vos conseilliers, desquels il vous plaira l'entendre et me faire cest honneur de croire que je vous seray, toute ma vie, bienhumble seur et obéissante. Sur ce, m'estant humblement recommandé à vostre bonne grâce, je prie Dieu, Monsieur mon frère, vous donner en parfaicte santé, heureuse et longue vie. De Delff, ce 5 de septembre 1584.

Vostre bien-humble et obéissante seur pour vous faire service,

Louyse de Colligny.

A Monsieur, Monsieur le Conte Jehan de Nassau, mon frère.

+ 1584.