Adamus exul

Psalmvs CXIV.

Incipiens in Exitv Israel de AEgypto.

CVm gens nobilis Isaci

AEgyptum celeri desereret fugâ,

Cùm prisci Iacobi domus

Felix arva Phari barbara linqueret,

Iudaeos sibi legerat

Insacra aetherij jura peculij,

[p. 33]

 

Hebraeósque sibi Deus

 

Divinâ proprios lege dicaverat.

 

Tunc rubro mare gurgite

 

Decessit pelago funditús intimo:

 

Tunc Iordanis ab ultimis

 

In fontem refluas duxit aquas vadis.

 

Tunc sublimia montium

 

Saltarunt tremulis verticibus juga,

 

Vt dux lanigeri gregis;

 

Saltaruntq́ue ovium foetibus aemula

 

Frondentûm extima collium.

 

Naturae veterem quid novat ordinem?

 

Cur rubro mare gurgite

 

Decedis pelago funditus intimo?

 

Cur Iordanis ab ultimis

 

In fontem refluas ducis aquas vadis?

 

Cur sublimia montium

 

Saltatis tremulis verticibus juga,

 

Vt dux lanigeri gregis;

 

Saltatisq́ue ovium foetibus aemula

 

Frondentûm extima collium?

 

Respondere Dei facta potest manu

 

Orbis machina totius.

 

Presenti meritò contremui Deo,

 

Presenti Iácobi Deo:

 

Rupes imperio cujus aquas dedit,

 

Et fluxit silice ex rudi

 

Fontis perpetui more sacer latex.