Piksjitten op Snyp

Haadstik 6
Frou mei blyn fertikaal each

Neffens de kaart wennet De Grutsk yn in hûs. Dizze hûndert en tolve kubike meter lucht is in wenning. Mar hy wit noch altiten net oft dizze romte nei al dy jierren omtoarkjen ek in thús is. Sokke fragen leit er himsels ek net mear foar. Dizze kubike meters lucht earne op it heechste punt fan de Aldehou foarmje alles wat er no hat. En dat is al folle mear as de dzjunken dêre fier ûnder him yn de iepen kelders, yn de hoeken en hernen fan winkels en flets. Hy hat in dak boppe de holle. Foar sa lang as it duorret, want soms sjitte de grutte fleanfûgels der mar krekt oerhinne of der deun by lâns.

Op it dakterras hat er soms oanstriid en stap yn it liif fan sa'n útgroeide earrebarre. In buorfrou skelt yn in taal dy't er net ferstiet sa'n fleanend meunster de hûd fol. De pear kear dat er boppe op it dak siet. Eins fynt

[p. 19]

er it dêre fierste gefaarlik. Hy krijt elke kear oanstriid en spring oer de râne. Mar dat hie er as jonkje op de Aldehou en op de Bellevuetoer fan It Oranjewâld ek al. It Roekenêst sit dêr wat tuskenyn.

Mei ien each ticht sakket dy langst om te springen foar de helte, mar dan sjocht er wer hast neat, en wurdt it op in oare wize libbensgefaarlik. Miskien binne sokke terrassen wol spesjaal oanlein foar bline minsken. De Frou út de binnenstêd leit faak mei har fertikaal ticht each op har terras yn de sinne. Iepen en bleat, mei útsprate skonken en sûnder eangst. De oare eagen hat se ek ticht. Mar De Grutsk twifelet deroan oft dat tredde each wol echt blyn is. Sabeare blyn bestiet ek. Guon hawwe soms dat each tichdutsen mei kramtried, of stikeltried. En dat is út soarte gefaarlik foar de kul.