Piksjitten op Snyp

Haadstik 17
Piggelmeesyndroom

Earne yn de toer raast in frou. It is alve oere nachts. It sil wol wer ien wêze dy't nei ûnderen springt. No't de lift net wurket sitte de lju te lang opsletten. As kninen yn te lytse hokjes, en mei beferzen gers yn de iiskasten. De Grutsk beslút de oare dei in klacht yn te tsjinjen by de offisier fan justysje. De gemeente befoarderet op sa'n wize dat it persintaazje selsmoarden omheech fljocht en dat de rûchskerne noch mear begjint te stjonken. Der komme wat langer wat mear betinkingskrúskes om de flet hinne dêr't oait in bewenner syn ein fûn. Normaal kuierje is hast net mear mooglik.

De Grutsk hat yn dizze liftleaze dagen en nachten aardich wat saken regele. Foar De Psyk hat er fiif ferhaaltsjes op papier setten. Under oare it ferslach fan it gefjocht fan De Baarch en it wiif fan De Jouk. Dat sil er wol prachtich fine. Syn ideeën oer it proses yn de regearingsstêd hat er dellein yn sân stellingen. Sokke lju tinke meastens swart-wyt, en dêr moatte jo jo út soarte by oanslute. Op it antwurdapparaat fan it belêstingfabryk hat er oankundige dat er binnen tsien dagen tekst en útlis jaan sil oer de útjeften foar en oan de eks, foar de bern en foar it yn stân hâlden fan de folkloare yn it âlde lân. Dat is fakentiids in apart haadstik mei't de folkloare noch net opnommen is yn it boargerlik wetboek en dêrtroch ek net bekend is yn de burelen fan it belêstingfabryk. Oan de oare kant binne ynkomsten wol altiten bekend, ek út de folkloare, en dy twa saken flokke fansels. It is fan twa ien: of jo erkenne dat folkloare legaal is, en dan is al it oare ek legaal, of jo sizze dat folkloare yllegaal is, en beslute jo dat de ynkomsten dêrút net besteane.

[p. 61]

Hawar, De Grutsk hat it helder dellein yn de Stellingen.

Fierder leit der kommentaar op it prachtstik fan syn Roomske adfokaat, dat er brûke kin by syn ferdigening. Oan De Frou út de binnenstêd hat er skreaun, dat er sa njonkelytsen de skurft hat fan al dy kutsweagers en kulskoansusters dy't er dêr yn de wykeinen faak tsjinkomt. Yn dy brief hat er in diskusjenoata bysletten mei fiif haadpunten dêr't se it meikoarten ris oer ha moatte. It wichtichste punt dêryn is it Piggelmeesyndroom dat er al trochpraten hat mei syn psyk. De produksje hat dus heech west.

No sjocht er ferromme nei de opsierde tafel dêr't in âlde foto fan De juf Annach op stiet, twa itensboarden, twa glêzen, ien flesse wyn en sân kearsen. De earste hoer sil streekrjocht foar him oer sitte. It ritueel kin begjinne. De ferhalen kinne trochgean. It boek begjint te praten.