Den lust-hof der Christelycke leeringhe

[p. 122]

Hymnus matutinus, ex variis Ecclesiae hymnis consarcinatus.

Somno refectis artubus
Spreto cubili surgimus,
Nobis Pater surgentibus
Adesse te deposcimus.

Aufer tenebras mentium,
Fuga cateruas daemonum,
Expelle somnolentiam,
Ne pigritantes obruat.

Da dexteram surgentibus,
Exurgat vt mens sobria
Flagrans, & in laudem Dei,
Grates rependat debitas.

Te lingua primùm concinat,
Te mentis ardor ambiat;
Vt actuum sequentium
Tu Sancte sis exordium.

At fraude si quid daemonum
In noctibus deliquimus,
Abstergat illud caelitùs
Tuae potestas gratiae.

Te sancte Christe poscimus,
Reple tuo nos lumine,
Iubarq́ue sancti Spiritus
Infunde nostris sensibus.

Sic tota decurrat dies,
Ne lingua mendax, ne manus,
Oculíve peccent lubrici;
Ne noxa corpus inquinet.

Vitemus omne noxium,
Nec torpor instet cordium;
Nec criminis contagio
Tepescat ardor spiritus.

Laetus dies hic transeat,
Vt culpa nullum deprimat:
At corde puro sordibus
Te perfruamur largiùs.

Praesta Pater piissime,
Patriq́ue compar vnice,
Cum Spiritu Paraclito
Regnans per omne saeculum. Amen.