Horae Belgicae

[p. 156]

¶ Nr. 75.

Dit is die wise:
Het diende een edel schiltcnecht goet
al sijnre weerder vrouwen,
hi schencte.....

Ic draghe in mines herten gront
een steen verciert mit stralen.
dat is heer Jesus, der maechden soon,
mijns herten wenschelgaerde.

Mer wie mit Jesus cosen wil,
die moet al laten varen
der werelt ghenoechte ende al haer spel
ende nemen sijns brudegoms ware.

Hi is een soete minnenbant,
mijns herten wenschelgaerde.
ic willen ooc immers voor alle mine vrent
in minen herten draghen.

Door hem so wil ic laten vaern
ooc al die werelt ghemeine.
hi dunket mi alle tijt schone staen
des winters als in den meie.

Niemant houde sich also cloec,
dat hi der werelt betrouwe.
wie hare ghenoechten mit vrouden dient,
si sal hem lonen mit rouwen.

Laetse dansen, laetse speeln,
haer corte ghenoechte driven.
so wie heer Jesus ghelaten heeft,
hem en can gheen heil becliven.

Adieu, adieu bedriechlike werelt,
ic wil nu van u scheiden,
so sal ic ewelic blide sijn
nae deser corter ellenden.

[p. 157]

8.

Ic wil mijn hertken breken af

 

mit hameren ende mit tanghen,

 

ende senden dat Jesu in sijn coninclike sael,

 

ic hope hi salt vriendelic ontfanghen.

 

 

9.

Ic meine mijn lief ghevonden haen

 

ende stede vrolic bliven.

 

nu moetic ellendich buten staen:

 

wes mach ic mi verbliden?

 

 

10.

Hier om en willic niet laten af

 

ende gheenre droefheit wiken.

 

mijn lief die is van aerde goet,

 

hi en sal mi niet beswiken.

 

 

11.

Ic sie mijn lief also ghedaen:

 

der werelt die moetic sterven,

 

ic moet mijns selves te mael uutgaen,

 

sal ic sijn hulde verwerven.

 

 

12.

Tribulacie is hier der minnen spel,

 

daer in wil ic mi verbliden.

 

door hem so wil ic draghen last

 

ende hem ghetrouwe bliven.

 

 

13.

Den wech den hevet hi voor ghegaen,

 

den willic overliden.

 

so wie mijn lief navolghen wil,

 

die moet volstandich bliven.

 

 

14.

Hi is een soete minnenbant,

 

mijns herten wenschelgaerde.

 

ic hebben ooc voor mijn hoochste lief

 

in minen sin gheladen.

 

 

15.

Door hem so willic laten vaern

 

begheerte menigherleie.

 

hi is ene rose die alleweghe bloeyt

 

des winters als in den meie.

B. 37. - Hs. 1, 1. groet (gront) - 1, 3. soon (lief) - 6, 1. spoelen - 7, 1. Addev.