¶ Nr. 105.
Dit is die wise van den werliken mei.
1.
Die lieve coele mei die is ons ontdaen,
ic sie dat cruce so hoghe staen.
2.
Daer aen so hanghet een jonghelinc,
daer onder staet die lieve moeder sijn,
3.
Vijf rosen staen daer aen den mei
ende ander bloemkens menigherlei.
4.
O edele siele, merket vromelic aen,
hoe soetelic singhet die wilde nachtegael!
5.
Als aen den cruce daer hi aen stont,
uut liefden was sijn herte ghewont:
6.
Ende heeft daer iemant hongher of dorst,
die come ende drink uut Jesus borst,
7.
Mijn hertenbloet wil ic hem schenken:
o mensche, wilt op minen doot ghedenken!
8.
Ende latens u niet uut uwen herten gaen!
o edele siele, omme u ist al ghedaen. -
9.
O god here, wanneer, wanneer? -
wanneer die soete god wil ende niet eer.
B. 86. - Hs. 1, 1. ondaen - 2, 2. steit - 3, 1. Wyf - 4, 1. vromelicke - 4, 2. suetelicke - 8, 1. wtten uwen - 9, 1. 2. nur Einmal wanneer.