Print Horae Belgicae(1968)–A.H. Hoffmann von Fallersleben Vorige Volgende VI. ¶ Een liedeken vanden slach van Blangijs. 1. ALsmen duysent vierhondert schreef. Ende neghenentseuentich iaer Wat schoonder victorie doen becleef den vlaminghen dat was waer Te Blangijs al op dat velt daer heeft den Leeu zijn clauwen ontdaen met machte ende met ghewelt met foortsen door dronghen Si riejpen alle Flander de leeu met vlaemschen tonghen [p. 10] 2. Als die Lupaert sach zijn vianden hi en sorchde voor gheen ghequel hi thoonde zijn clauwen ende ooc zijn tanden zijn briesschen ende dat was sel Sijn ooghen blaecten al waert een vier doen riepen alle die capiteynen God hoede ons in dit bestier Beyde oude metten ionghen si riepen alle Flander de leeu met vlaemschen tonghen 3. Die Franchoysen quamen an seer cloeck ende onuersaecht ons Prince sprack, elck si een man Het moet hier vromelijck zijn gewacht Elck si gemoet ghelijck een Lupaert doen sprack die graue van Romont edel vlamingen thoont uwen aert die pijckeniers doordronghen Si riepen alle Flander de leeu met vlaemschen tonghen 4. Ons edel prynce Maximiliaen hy beete hem neder te voet. Ende hi viel ouer zijn knien biddende Grode met ootmoet Kinderen dus wil ick dat ghi allen doet Ende ghi heeren van hooger weerde met dien maecte hi een cruyce voor hem Hi custe die aerde die tranen hem ontspronghen si riepen alle Flander de leeu met vlaemschen tonghen 5. Myn here van Beuer ende menich lantshere Baenrootsen van machte groot, behaelden daer prijs ende eere This recht, want het was wel noodt midts hulpe vanden pijckeniers daer bleuender wel thien duysent doot [p. 11] Van tsconincx van Vranckerijc hersiers Hoe vrolijck dat si songen Si riepen alle Flander de leeu met vlaemschen tonghen 6. Jn Oestmaent den seuensten dach So is den slach geschiet Jck bidde maria daer God in lach Ende hem die alle dinck versoet Bi zijnder godlijcker cracht Wi willen hem om victorie bidden hi heues also wel die macht met handen ghedronghen Si riepen ahe Flander de leeu met vlaemschen tonghen Vorige Volgende