Horae Belgicae


CXIV. ¶ Een nyeu liedeken. 1.[regelnummer] MJin sinnekens zijn mi doortoghen Van een schoon ioncfrou fijn si doet mi pijne dooghen Si is die alder liefste mijn Om haer so wil ic waghen mijn lijf ende al myn goet Mijn lijf ende al myn goet Ende laten vrienden ende maghen Ende schencken haer mijns herten bloet 2.[regelnummer] Die liefste mach ick wel schriuen door v vrouwelijcke beelde schoon Want bouen alle wijuen Spant si int herte der minnen croon Si staet in mijn behagen
[pagina 173]
Op haer rust mijnen moet Op haer rust mijnen moet. dus wil ic haer liefde draghen Ende schencken haer mijns herten bloet 3.[regelnummer] Twijfel gheeft mi veel nopen Anxt ende suchten is mi bi Naer haer staet alle mijn hopen dies ic moet zijn van herten bly Mijn sinnekens na haer iaghen die mi dick suchten doet Die mi dick suchten doet Al soude mi druc noch plagen Jc moet haer schencken mijns herten bloet 4.[regelnummer] Venus strael van minnen Heeft mijn herte seer doorwont Jck blijue ghequetst van binnen doort deruen van mijns liefs roode mont Ny ende tot allen daghen Wort si van mi ghegroet Wort si van mi ghegroet Om haer moet ic nv claghen Ende schencken haer mijns herten bloet 5.[regelnummer] Princersse melodieuse. Schenct uwen dienaer medecijn Bouen alle schoone amoreuse Suldi int herte die liefste zijn Al legghen die niders laghen Hout mi in v behoet Hout mi in v behoet Ende wilt mi niet veriaghen Jck sal v schencken mijns herten bloet.