Print Horae Belgicae(1968)–A.H. Hoffmann von Fallersleben Vorige Volgende CLXXXVII. ¶ Een nyeu liedeken. 1. HOort toe al int ghemeyn Een leyt met droeuichede Hoe dat ons Keysers huysvrouwe reyn Ter werelt es ouergheleden Sy was seer goet den armen Ende huer ghemeente int ghetal Laet ons god bidden ouer al dat God die siele wil ontfermen 2. Die arme menschen breet ende wijt die moghen wel druck oorboren Want si hebben als nv ter tijt Seer veel aen haer verloren [p. 287] Ende al die ghemeente mede dat mochtmen wel mercken Sijt dies wel vroet Hoe si haer schamel ghemeente bijstont Jn spaengien dit is waerhede 3. Nv suldi horen haer beclach God wil die siele gheleyden Op die meydach hoort mijn ghewach So is si vander werelt ghescheyden Coninck philips haren sone ghepresen die was daer altijt in present Als si ontfinck dat heylighe sacrament Ende hi moeste altijt bi haer wesen 4. Adieu coninck philips mijn sone goet Want ic moet henen varen Ende alle mijn kinderkens met der spoet God wil v in duechden sparen Adieu coninck van Portugale verheuen Adieu coninck broeder domfernant Jc moet gaen trecken in een ander landt Christus wil mijn bewaerder wesen 5. Adieu Karolus keyser wtuercoren God wil v bewaren ende sint Andries En helenora mijn suster hooge geboren Vrou marie god wil v behoeden voor meerder verlies Jc moet de werelt begeuen dus oorlof ghi heeren onghespaert die hier ten houe sijn vergaert Wilt toch eendrachtelijck leuen 6. Si riepen al zijt vroom in stryt Naden hemel sloech si haer ooghen Sy sprack o ihesus ghebenedijt Wilt mi v ghenade toghen Die doot quam huer bestoten Si sprac o heere God onbeureest Jn uwen handen beueel ick mijnen gheest dus heeft si huer ooghen gheloken [p. 288] 7. Al die daer hebben bi ghestaen die groot metten cleenen Si weenden daer so menighen traen Met droeuegher herten ghemeene Jn die stadt van Tollete met groten rouwe daer is si vander werelt ghescheen God wil die edel siele gheleen Van onsen genadigen Keysers vrouwe Vorige Volgende