Print Horae Belgicae(1968)–A.H. Hoffmann von Fallersleben Vorige Volgende CCIX. ¶ Een nyeu liedeken 1. WJe wil hooren een goet nieu liet dat van twee goey Lijnkens is gesciet Men singhet voor een cluyte Sy deden dat haer Vrou Venus riet Sy ghinghen metten naeyecorf uyte 2. Jck quam ghereden al door een lant Daer ick twee ionghe vroukens vant Spelende al op die luyte Sy ghinghen te samen eeuen ghanck Sy ghinghen metten naeykorf uyte 3. Tot grietkens van brusel sat ic en dranc Met mijn schoon Lijnken op de banc Het was een roosken van virtuyte Wi ghinghen tsamen eenen ghanck Wi ghinghen metten naeykorf uyte 4. Och naeien is so goeden dinc Aylacen het brenct veel sorghen in Dat mijn herteken sluyte Al zwelt mijn buycxken niet te min Metten nayekorf gae ick uyte 5. Naikorf naikorf reyn maechelelyn. Altoos wilt ghi gedragen zijn. Bi gildekens metter fluite. Tsmorgens vroech inden coelen wijn. Ende tsauonts metten naeiekorf uyte [p. 324] 6. Des morgeNs als ic laet op staen. Vroech wil ic ter kercken gaen. Met mijnder scheeuer tuyte. Als ic wijwater heb ontsaen So gaen ick metten naeikorf uyte 7. Jc lach in een prieel geuaen. Eylacen dat heeft mijn naeyen gedaen. Je hielde mi inde muyte. Mocht ic op tsheeren straten gaen Noch ginck ick metten naeikorf uyte 8. Die dit liedeken eerstmael sanc. Was een geselleken vander banc. Hy schoyde gelijc een guyte. Hi nam zijn Lijnken metter hant Hi ginc met haer metten naeicorf uyte Vorige Volgende