Briefwisseling. Deel 2: 1634-1639

1322. Aan R. Descartes⁶⁾. (K.A.)

Le tourneur d'Amsteldam m'a un peu faict languir apres cest essay, mais enfin le voyci à bout de mon hyperbole, non sans hyperbole de vray, car pour le premier coup, il me semble que c'est bien allé, et les faiseurs de lunette, en ayants veu le moule en papier, ont osé dire, que s'il l'achevoit, ils estoyent contents de manger le verre; mais il leur importe de descrier le tour, qui un jour doibt ruiner leur mestier. Encor mon artisan se plaint de n'avoir esté pourveu des instruments qu'il souhaitteroit d'y pouvoir approprier une autre fois, et que par ainsi en tastonant il a cassé plus de trois verres sur l'essay. Quoyqu'il en soit, j'espere que vous ne trouverez point icy aucune apparence des faultes que vous avez apprehendé que le tour debvoit mener en cercle. Au moins il n'y a rien de perceptible au sens exterieur. Dont j'ose conclure, soubs vostre permission, qu'au moyen d'un artisan adroict comme cestuy-ci et bien pourveu d'engins necessaires - en la recherche desquels on pourroit l'assister - il y auroit moyen de se passer du vostre, auquel, sortant de la main du menuisier, je preveoy des incon-

6) Kopie van andere hand. Afgedrukt in de Oeuvres de Descartes, t.a.p., I, blz. 332.

[p. 140]

veniens de mechanique encor plus importants que ne pourroyent estre ceux du tour. Mon discours vous fera bien sentir que je doibs estre du mestier que je tache de patrociner. Mais je veux humblement plier dessoubs voz censures, puisque je les tiens, comme je doibs, superieures à toute la philosophie naturelle du monde. Nous en verrons les preuves admirables, quand il vous plaira, mais ce sera toujours tard à mon attente. Souvenez vous de la solemnité des promesses, s'il vous plaist, et hastez vous au miracle de rendre la veüe aux aveugles. Mons. Reneri¹⁾ m'a asseuré en haste, que vous en persistez au dessein. C'est de quoy je ne puis cesser de vous conjurer, non plus que d'estre à jamais .....

A vostre commodité j'attendray sçavoir, si ce verre vous aura esté rendu, et comment vous estimez que nous fassions du reste, pour achever nostre essay. Arnhem, le 5^e de Decemb. 1635.

1) Zie blz. 61.