Briefwisseling. Deel 2: 1634-1639

[p. 248]

1585. Aan prinses Amalia van Oranje. (H.A.)*

Hier, environ les 6 heures du matin, l'armée partit de Noordgeest - d'où j'escrivis ma derniere avanthier - et en arriva la pluspart de bonn'heure à Roosendael. Quelques trouppes de l'arrieregarde seulement ne peurent entrer avant les 11 heures de nuict au quartier, où se trouva aussi le regiment de Mons.^r de Charnacé, qu'il mena en personne, plusieurs de ses officiers estants malades et absens. - De Roosendael on est parti à ce matin à la pointe du jour, et par une bien grande marche, qui encor a esté incommodée de la pluye continuelle, on est arrivé d'assez bonn'heure icy, où S. Alt.^e a promptement designé, quelle sera la ligne de la circonvallation, et y va faire travailler dès demain par quelques 1500 soldats, à l'endroict des plus considerables avenuës, pour apres amender le tout aveq le temps, et arrester les quartiers.

Monsieur le comte Henry¹⁾, qui est icy depuis trois jours, a desjà fort travaillé au sien, sans que ceux de la ville y ayent porté aucun empeschement, ne tirans presque aucun coup de canon. On en veult faire jugement que le gouverneur se trouve peu pourveu de poudre. Chascun asseure au moins, que c'est contre son opinion que ce siege s'entreprend, ne l'ayant voulu croire jusques à hier. - La voix commune est aussi, qu'il y a de deux à trois mil soldats de garnison, et que ledit gouverneur faict courrir le bruict qu'il auroit receu une lettre du Cardinal Infante, qui l'asseureroit en parole de Prince de l'aller secourrir en personne. - Cependant on n'apprend pas, qu'il passe encor aucun homme par Anvers en decà, le monde n'y ayant voulu croire hier au soir, que Breda fust investie. S. Alt.^e se porte bien à merveille dans ceste fatigue, et nous est chose estrange, de le veoir tant monter à cheval sans incommodité, pour ne l'avoir faict de si long temps.

J'escris cecy d'une mauvaise main dans un chariot, n'y ayant icy ni tente, ni maison, fort qu'une, où S. Alt.^e est logée. Selon ce qui arrivera de consideration, j'iray continuant mes histoires, ne sachant bien encor, si la voye d'escrire par Geertrudenbergh est fort seure. Au camp pres de Breda, le 23^e de Juillet 1637.

1) Hendrik Casimir, Stadhouder van Friesland.