Briefwisseling. Deel 2: 1634-1639

1605. Aan prinses Amalia van Oranje. (H.A.)*

J'ay ordre d'envoyer toutes les encloses à V. Alt.^e et ne puis trouver presqu'aucune chose à y adjouster. Aussi, tant que nous ne ferons que travailler

[p. 256]

à noz retrenchemens, sans que personne s'approche, pour nous en divertir, les matieres des lettres seront froides, ou ennuyeuses en redites. - Nous avons des adviz assez amples du costé d'Anvers, mais, en un mot, ils portent, que depuis la prinse de Landrechies et le grand progrez de ces ouvrages icy, l'enemi se trouve fort confus et irresolu, les comtadors generaulx hors de credit aupres des marchands, les soldats malvolontaires, et les peuples en consternation, et nommement les ecclesiastiques, qui ont faict remonstrer au Cardinal Infante, par la bouche de l'evesque d'Anvers et l'abbé de S.^t Michel, le grand interest qu'ils auroyent en la perte de Breda, le sommants d'y avoir l'oeil, et de le considerer comme une tres-importante piece au service du Roy et à sa reputation.

Sur ces instances et autres deliberations, ils auroyent resolu, apres l'espreuve que doibt faire icy le comte Jan de Nassau - comme j'ay marqué par le passé - que, son dessein venant à manquer, le Cardinal Infante marchera vers nous en personne, aveq une armée, qui, à force de desnuer toutes les garnisons, grossiroit au nombre de 16000 hommes de pied, et 5000 chevaulx, y comprenant les 3000 de Piccolomini, qu'on attend tousjours en impatience. Aveq ces forces on se hasteroit de nous attaquer, mesme le premier jour d'Aoust, se faisant en mesme temps force prieres publiques et publications d'indulgence. Nous verrons ce qui arrivera, mais s'ils ne tienent mieux leur jour que le comte Jan en sadite espreuve, qui debvoit estre faicte il y a deux jours¹⁾, nous vivrons encor le 2^e d'Aoust. Un bourgeois de la ville, nommé Van den Broeck, a esté apprehendé, et 12000 franqs tirez hors de sa maison hier, à cause d'une lettre qu'on a trouvé qu'il auroit escrite à S. Alt.^e - qui n'a point esté delivrée - en luy descouvrant le foible et mauvais estat de la ville. Au camp à Ginneken, le 30^e de Juillet 1637.

1) Zie No. 1595.