Briefwisseling. Deel 2: 1634-1639

2093. Aan R. Descartes³⁾. (K.A.)

Je ne masche pas si lentement que peut-estre vous croyez les bons morceaux qui partent de vostre main. Il y a longtemps que j'ay avallé ceux dont vous me redemandez les plats, que je vous renvoye. Mons.^r le resident d'Angleterre⁴⁾ a voulu estre du festin, cum tacitus pasci non possem corvus⁵⁾, et c'est la cause pourquoy je fay si tard ce que j'eusse eu meilleure grace de faire sans vostre sommation. Mais comme j'ay bien accoustumé de forfaire en vostre endroict, je sçay que vous estes en habitude de me pardonner et m'y repose, pour tout compliment.

Vous me chatouillez au reste de la mention que vous faictes, de vouloir arranger ces objections et solutions pour les donner au publiq; obligez moy, sans le publiq, de ne bransler point de ceste deliberation. Et si c'est l'acheminement à de plus fortes resolutions, je dis à mettre le Monde au monde⁶⁾, sachez que tout le monde lettré en recevra des satisfactions indicibles, et vous rixae multo minus⁵⁾, au contraire de ce qu'il semble que vous en imaginez. Il est vray qu'autrefois je me suis avancé à vous en presser et que peut-estre mes lettres vous en auront esté moins bien venues; mais si vous sçaviez de combien d'endroits on me pousse à rebatre tousjours cest enclume, vous en aggreeriez l'importunité encore pour ceste fois, qui sera la derniere, si vous me le commandez avecq ce que vous avez d'authorité sur moy, qui suis autant et plus que personne ..... A la Haye, le 15^e de May 1639, au coeur des facheuses occupations que me donne la sortie de noz troupes en campagne.

3) Kopie van andere hand. Afgedrukt in de Oeuvres de Descartes, t.a.p., II, blz. 546.

4) William Boswell; zie I, blz. 407.

5) Horatius, Epist., I, 17, vs. 50, 51.

6) Le monde ou traité de la lumière heeft eerst in 1664 te Parijs het licht gezien.

5) Horatius, Epist., I, 17, vs. 50, 51.