Briefwisseling. Deel 3: 1640-1644

3046. Aan prinses Amalia van Oranje. (H.A.)*aant.

M. le Rhingrave revint hier au soir en ce quartier²⁾, se louänt extremement de Messieurs de Dona²⁾, de Schomberg³⁾ et de Welderen²⁾, et un peu plus mediocrement de quelques autres, qui eussent peu le seconder aveq un peu plus de promptitude, et sans doubte la belle occasion, de trois compagnies de cavallerie et de douze d'infanterie espagnole et alemande, eust esté mesnagée au grand honneur de l'estat. - Du costé des enemiz il tesmoigne avoir receu toute civilité, tant par D. Andrea Cantelmo, et le comte de Fontaine, que par D. Francisco de Melo mesme, qui pourtant n'a pas mis pied à terre, en l'entretenant au camp, ou son armée estoit en bataille, et commençoit à marcher tres-belle en infanterie et cavallerie. Il dit tout hault, apres beaucoup d'honestes recommandations à S.A., qu'il luy voulust dire, qu'il s'en retournoit aveq ceste armée vers France, et luy recommandoit la petite qu'il laissoit icy soubs le comte de Fontaine. - Hier apres midy il arriva un furieux esclandre dans Wezel, par l'embrazement de neuf barillets de poudre dans la rue⁴⁾, de quoy parce que V.A. aura apprins des bruicts fort divers, comme il nous est bien arrivé icy à deux heures du lieu, il m'a semblé, que, pour informer V.A. de la verité, je devois luy envoyer copie de ce que m'en escrivit tost apres le major de la ville, pour en esclarcir S.A. - Ajourdhuy S.A. a envoyé par un de ses trompettes aux comtes de Hatsvelt en de Wahl la response que leur font les Estats Generaulx⁵⁾, sur l'esclarcissement qu'ils leur ont voulu faire, touchant la venue de S.A. en ces quartiers icy⁶⁾. Le contenu est presque de mot à mot ce que S.A. leur avoit prognostiqué leur debvoir arriver par response, comme dès lors j'eus l'honneur d'en donner quelque cognoissance à V.A. - M. Jermin n'est pas encor arrivé. Au camp à Bodberg, le 5^e Juïllet 1642.

2) Zie No. 3043.

2) Zie No. 3043.

3) Zie blz. 304.

2) Zie No. 3043.

4) Huygens heeft een paar Latijnsche versjes geschreven op het ongeluk (vgl. Gedichten, III, blz. 184).

5) Zie No. 3040.

6) Dat afschrift is aan den brief toegevoegd.