Briefwisseling. Deel 4: 1644-1649

[p. 48]

3707. Aan prinses Amalia van Oranje. (H.A.)*

Par ma derniere d'avanthier je me suis donné l'honneur d'informer V.A. de nostre heureux passage sur la contrescarpe du Sass. J'espere que, si V.A. a esté partie de la Haye, de quoy je n'ay peu sçavoir le jour, mon messager l'aura sceu rencontrer en chemin, et n'aura pas porté ma lettre à la Haye, quoyque j'en soye en doubte. - Depuis eeste conqueste nous n'avons travaillé qu'à nous faire valoir, en sappant de part et d'autre vers les bastions qu'on pretend d'attaquer. Et les enemis, continuans en leurs prouësses, ne nous y ont donné jusques ores aucun empeschement ni incommodité. Un tambour de la place cependant tesmoigne, qu'à ce passage il y avoit plus de 400 hommes sur la contrescarpe, qui s'estoyent tous retirez sans ordre, et que, comme nous commencions à travailler pour y loger, le comte de Meghen voulut faire avancer du monde pour nous rechasser, mais qu'il luy fut respondu par des officiers et soldats, Monsieur, marchez devant, on vous suivra. Qui estant un langage assez mutin, et malseant à des gens qu'un chef commande, il paroist visiblement qu'il doibt y avoir de la brouïllerie dans ceste place. Le mesme tambour advouë que le coronel de Roijer, officier de grande estime parmi eux, fut tué le mesme matin. Et cela a esté assez verifié par une lettre que m'escrivit encor hier le gouverneur pour supplier S.A. d'un passeport à faire sortir le corps mort aveq quatre valets et quatre chevaulx et son bagage, ayant paru par son testament, qu'il a voulu estre enterré au païs de Liege, sa patrie; et ceste faveur a encor esté octroyée aujourdhuy, comme fut hier celle que le comte d'IJsenburg¹⁾ avoit demandé pour Don Juan d'Ossorio, blessé à la teste²⁾. Mais son passeport a esté renvoyé aveq compliment, sur ce qu'il se portoit mieux, et ne desiroit pas sortir, quoyque le tambour à leur mine croyoit qu'il fust mort.

La dispute touchant la parole donnée ou non donnée à nos officiers et soldats, sortis des forts sur le canal, ayant trop duré, S.A. pour en sortir par la plus courte voye, s'en est remis absolument à la. declaration de Don Francisco de Mello, qui sur ceste courtoisie, a declaré, qu'il se condamne luy mesme à payer la rançon des siens, et en excuse les nostres. Là dessus nous avons renvoyé aujourdhuy tous leurs prisonniers, qui sont 17 officiers et 217 soldats, aveq une liste de leurs rançons et despens, les nostres demeurans defrayez de tout.

J'estime que dans demain nous pourrons lonër le travail de nos galeries. - Aujourdhuy par malheur a esté tué aux approches le capitaine Kerstein, du regiment de Ferents³⁾, brave homme, qui à la retraicte de Gelder fut estroppié d'un coup violent, que lors il soustint d'un courage memorable. Au camp devant le Zass, le 24^e d'Aoust 1644.

1) Zie II, blz. 193.

2) Zie No. 3696.

3) Zie III, blz. 32 en 33.