Van vrientschap.
EErsame seer beminde vrienden N.N. Ick ghebiede my in v goede gratie. En ick laet u vveten datter gheen dinck eerlycker ende profytelijcker is, en beter dient ende voecht den Christenen dan het onderhouden van eerlijcke vrientschap oft broederschap. Want niemant is wijs in zijn eyghen saken. Daerom ist seer goet een Mensche, een hulper heeft in zijn noot, een vertrooster in lyden, een leeraer in't gheen hy niet en can, die hem in als is radende en helpende als hem selven, en dese vrient moet bescheyden en discreet vvesen om ons ten besten te raden in voorspoet, en machtich om ons te helpen in teghenspoet. Daerom soo seyt die Wijseman, Eccl. 37. hout ghestadighe vrientschap met een Godtvruchtich man, vviens Ziel nae v Siel is, die met v als ghy dwaelt ende mist te medelyden is: Sulcke vrienden hebben gheweest Dauid ende Ionatas, die malcander in last en noot byghestaen hebben, want Ionats stelde zijn leven voor Dauid in perijckel. Twelck oock David nae zijn doot vvederom aen zijn kint vergouden heeft, 1.Reg.18.19.20. Die een vvaerachtich vriendt ghehouden heeft, die heeft ghehouden het grootste schat der aerden. Dusdanighe vriendtschap hebben Godt vruchtighe menschen met malcanderen, ende vvort ghevoet ende onderhouden, met malcanderen vrientschap te bewijsen met cleyne ghiften en gaven, met ghemeynschap van spijt en dranck.
Want vrienden hebben gheen verscheyden goet.
Auteursrechtvrij