Ghemeene seyndtbrieven

Een nieu iaer.

LIeve seer beminde discipulen N.N. Ick vvensche v al t'samen toe een vroom ende een deuchdelijck leuen. Aengesien dat dit tegenwoordige Iaer van 88. by nae ghepasseert is, ende nu een nieuwe Iaer voor handen is, Soo seynde ick v tot een groette ende

[fol. C2r]

voor een nieu Iaer dese brieven die hier in dit boecxken gheschreuen staen, om dat ghy v leven ende studeren daer na schicken sout, het vvelcke ist saeck dat ghy vvel vveet te vverck te stellen, soo sult ghy binnen corten tijdt vvel ende veel toenemen soo in goede leeringhen als een goet Christen leven, het welck het principaelst is, want vvat sout baten dat yemandt veel schoone talen coste spreken, ende alle consten daer by conde sonder een gheschickt ende deuchdelijck leven. Dit vvaer al niet met allen, daerom soo moet die deucht ende gheleertheydt ghelijck gheleert vvorden, of 'theeft altemael niet te beduyden, Daerom oeffent v in dese brieven, daer sult ghy vvel in vorderen met Godt gratie, en deur hulpe van goede onderwijsinghe, daerom leert nu noch te wijl dat ghy ionck zijt, en neemt v costelijcke tijt vvel in vvaer, en segt niet cras, cras, met die Raven, dat is, morgen morghen, Si non es hodie, cras minus aptus eris. Die luyden onbequaem is om te studeren, Morghen sal hy noch tragher leeren. Denckt dat na arbeyt sal ruste comen, nae studeringhe geleertheyt, nae gheleertheyt en deucht eere ende een salich leven, nae een deuchdelijck leven een salich sterven, ende die eeuwighe salicheyt. 'Twelck het eynde is vvaer nae dat vvy al ons leven behooren te schicken, vvant die dat sal missen die heeft hier qualijck geleeft. Beminde vrienden neemt het in danck, en leeft vroom ende studeert neerstich.

Al uwe dienaer ende vrient H.I.